100.5FM neem afskeid van Ludi Botha – ’n legende van die Laeveld-luggolwe

Dit is met groot hartseer dat Radio Laeveld 100.5FM afskeid neem van een van ons mees geliefde stemme en oud kollega, Ludi Botha, wat gisteroggend oorlede is na ’n siekbed.

Ludi was vir byna 13 jaar ’n sentrale figuur by Radio Laeveld. Hoewel hy die stasie in 2023 verlaat het, het sy invloed en nalatenskap steeds sterk deurgeskemer in die kultuur en gees van die stasie. Hy was nie net ’n omroeper nie, maar ook ’n mentor, tegniese steunpilaar en, bo alles, ’n vriend.

Sy unieke sin vir humor, sy vurige werksetiek en sy liefde vir die gemeenskap het hom diep in die harte van sy kollegas en luisteraars geplant. Ludi het onder andere die ontbytprogram aangebied, die middagspits en het die fondasie gelê vir die gewilde Top20 op Saterdae.

Oud-kollega Roelf van Jaarsveld vertel, “Hy het die binnewerke van die stasie op sy vingers geken en as dit moes, sou hy die stasie alleen op die lug gehou het. Sy entoesiasme en aansteeklike humor sal ons altyd bybly.”

Ludi se teenwoordigheid was tasbaar – of dit nou in die ateljee was, agter die skerms met tegniese ondersteuning, of in die gemeenskap waar hy sonder verwagting gehelp het waar hy kon. Hy het nooit gewag vir iemand anders om iets te doen nie. Hy was daardie iemand.

Ludi het stelsels help bou wat die werk van omroepers makliker gemaak het, en hy het iets besonders gebring na elke program. Sy betrokkenheid, lojaliteit en warmte het hom onmiskenbaar gemaak.

“Ludi was nie net ’n kollega nie – hy was jou regterhand, ’n staatmaker, iemand wat altyd gereed gestaan het om te help,” sê Amanda Botha, ’n oud-kollega. “Hy het altyd met ’n vonkel in die oog en ’n tergende grap op die lippe opgedaag. Sy stem was al vir ’n geruime tyd nie meer hoorbaar op ons klankgolwe nie, maar sy nalatenskap weerklink steeds in elke kollega se herinneringe.”

Namens die raad van Radio Laeveld wil ons ook hulde bring aan Ludi. Hy was ’n mens met ’n groot hart – lief vir die gemeenskap in die Laeveld, en altyd bereid om op te staan vir die wat hulp nodig gehad het. Sy toegewydheid aan veiligheidsprogramme, sy passie vir dierewelsyn en sy onbaatsugtige diens aan die gemeenskap was van monumentale waarde. Sy nalatenskap sal lank na-echo in die harte van almal by die stasie.

Ons sê nie totsiens nie, net dankie. Dankie vir wie jy was, vir wat jy gegee het, en vir die diep spore wat jy agterlaat.

Ons gedagtes en innige simpatie is met sy familie, vriende en almal wat sy pad gekruis het. Rus sag, Ludi.