100.5FM

#TrotsLaeveld

Current track

Title

Artist

Background

100.5FM Nuus

21 Mei

08:00

# SA verwelkom Internasionale Strafhof se versoek vir lasbriewe vir Netanyahu en Hamas-leiers

# ANC veroordeel skietvoorval tydens veldtog in Limpopo

# En Sokker: Arne Slot aangestel as Liverpool se nuwe hoofafrigter

# Suid-Afrika het die hoofaanklaer van die Internasionale Strafhof, Karim Khan, se versoek dat lasbriewe uitgereik word vir Israel se eerste minister Benjamin Netanyahu, sy minister van Verdediging en drie Hamas-leiers, verwelkom. Die lasbriewe is vir vermeende oorlogsmisdade en misdade teen die mensdom. President Cyril Ramaphosa se woordvoerder, Vincent Magwenya, sê almal moet gelyk wees voor die reg om die internasionale oppergesag van die gereg te laat geld en aanspreeklikheid te verseker vir diegene wat misdade pleeg: KLANK: ENG MagwenyaOnRuleOfLaw

# Cosatu het die Konstitusionele Hof se beslissing verwelkom dat oudpresident Jacob Zuma nie tot die Nasionale Vergadering verkiesbaar is nie. Die Verkiesingskommissie het Zuma as kandidaat gediskwalifiseer weens sy vonnis van 15 maande vir minagting van die hof in 2021. Die MK-party het hom op hul kandidatelys ingesluit. Matthew Parks van Cosatu sê die uitspraak is nóg ‘n welkome bewys dat Suid-Afrika op die regte pad is ná staatskaping en korrupsie toe politici ongestraf kon optree: KLANK: ENG MatthewonZuma

# Die ANC in Limpopo doen ‘n beroep vir geregtigheid ná ‘n gewelddadige geveg in Juju-vallei in Seshego, waarin twaalf mense beseer is, insluitend ‘n nege-jarige-meisie. Die ANC beskuldig die EFF oor Sondag se gewapende individue wat blykbaar mobiliseer is om hul veldtog Sondag te ontwrig. Die regerende party het die polisie versoek om die oortreders vas te trek en die Verkiesingskommissie versoek om teen die EFF op te tree vir die aanhitsing van geweld. Jimmy Machaka het die ANC se verbintenis tot vreedsame betrokkenheid herbevestig en ondersteuners aangemoedig om op hul verkiesingswerk gefokus te bly.

# Sport: KLANK:

# Die rand verhandel teen 18-rand 19-sent teen die dollar, 19-rand 76-sent teen die euro en 23-rand 13-sent teen die pond. Bitcoin verhandel teen 70-duisend-886-dollar 19-sent. Die prys van goud is twee-duisend-412-dollar 42-sent per fynons en die prys van Brent ruolie 83-dollar 16-sent per vat.

# En ten slotte: African Parks het begin met die volgende fase van Rhino Rewild, wat oor die volgende dekade twee-duisend suidelike witrenosters wil hervestig in veilige, beskermde gebiede regoor Afrika. Die Munywana-bewarea in Zoeloeland, KwaZulu Natal, het die eerste 40 renosters verwelkom, wat bewaring en gemeenskapspogings steun. Die voorsitter van die Makhasaytrust, Thokozani Mlambo, beklemtoon die uiters belangrike rol van grond in die gemeenskap se besit in bewaring. Die hervestiging fokus op die suksesvolle aanpassing van renosters deur waaksame monitering en verbeterde sekerheidsmaatreëls.

=============

21 Mei

09:00

# MK-party se stigter nader hof om sy verwydering tersyde te stel

# Netanyahu sê hy verwerp met veragting die Wêreldhof-aanklaer se versoek vir sy inhegtenisneming

# Krieket: Kolkata Knight Rides en Sunrisers Hyderabad spook dit vandag uit in eerste IPL-kwalifiseerder

# Die MK-party se stigter, Jabulani Khumalo, het ʼn dringende aansoek by die Verkiesingshof ingedien. Hy versoek dat die Verkiesingskommissie se besluit om hom te verwyder en oudpresident Jacob Zuma as die party se president aan te stel, as ongeldig en onregmatig verklaar en tersyde gestel word. Hy wil ook hê die hof moet die OVK beveel om hom as die party se president te erken. Khumalo sê Zuma het twee duidelike, onregmatige en prosedurele besluite geneem om hom as president te verwyder en sy partylidmaatskap te beëindig.

# AfriForum, Solidariteit en die Solidariteit-skoleondersteuningsentrum verskerp hulle druk op die regering oor die Wysigingswetsontwerp op Basiese Onderwyswette met ‘n griefskrif aan president Cyril Ramaphosa. Hulle dring aan Ramaphosa moet nie die wetsontwerp onderteken nie en moet dit terugstuur na die Nasionale Vergadering. Die adjunk-uitvoerende bestuurder van regsake van Solidariteit Anton van der Bijl waarsku die wysigings aan die wetsontwerp bedreig eentalige Afrikaanse skole se oorlewing en kan hofsake tot gevolg hê sou dit onderteken word.

# Die Padvragvereniging verwelkom die besluit deur die die All Truck Drivers Forum en Allied SA om hul beplande betoging te kanselleer. Die vereniging se uitvoerende hoof, Gavin Kelly, beklemtoon die belangrikheid daarvanvan om oplossings vir griewe te vind deur dialoog en samewerking. Kelly sê die vereniging staan ​​gereed om daaraan aandag te skenk en die Padvrag-taakspan te ondersteun met bekommernisse wat deur die All Truck Drivers Forum en Allied SA geopper is: KLANK: ENG-KellyOnTrucks

# Israel se eerste minister, Benjamin Netanyahu, het die aansoek vir sy inhegtenisneming as ʼn absurde en vals bevel verwerp. Die Internasionale Strafhof se hoofaanklaer, Karim Khan, vra dat lasbriewe uitgereik word vir Netanyahu en sy minister van Verdediging, Yoav Gallant, vir aksies in Gaza. Hy vra ook dat drie Hamas-leiers gearresteer word vir die aanval op Israel op sewe Oktober. Netanyahu sê Khan se optrede is net ʼn poging om Israel die basiese reg tot selfverdediging te ontneem: KLANK: ENG NetanyahuOnArrestWarrant

# Krieket: Die eerste kwalifiserende wedstryd van die Indiese Premierliga word vandag gespeel. Kolkata Knight Riders en Sunrisers Hyderabad, wat eerste en tweede op die punteleer geëindig het, pak mekaar in Ahmedabad. Die wenner dring deur na Sondag se eindstryd in Chennai. Die verloorder kry nog ‘n kans op die titelwedstryd in die tweede kwalifiseerder Vrydag in Chennai. Daardie span speel teen die wenner van môre se uitklopstryd tussen die derde en vierde spanne, Rajasthan Royals en Royal Challengers Bengaluru, ook in Ahmedabad.

# Die rand verhandel teen 18-rand 19-sent teen die dollar, 19-rand 76-sent teen die euro en 23-rand 13-sent teen die pond. Bitcoin verhandel teen 70-duisend-867-dollar 46-sent. Die prys van goud is twee-duisend-414-dollar 40-sent per fynons en die prys van Brent ruolie 83-dollar 14-sent per vat.

===============

12:00

# Regterlike Dienskommissie beveel drie regters vir Appèlhof aan

# ACDP verwelkom Konstitusionele Hof se beslissing oor Zuma se verkiesbaarheid

# Gholf: Scheffler se hofdatum uitgestel ná sy arrestasie tydens die PGA-kampioenskap

# Die Regterlike Dienskommissie het die Gautengse Hooggeregshof-regters David Unterhalter en Raylene Keightley, en die Oos-Kaapse Hooggeregshof-regter John Smith aanbeveel vir die Appèlhof. Hierdie aanbevelings volg nadat onderhoude met tien regters gevoer is vir drie vakatures. Unterhalter het kommer uitgespreek oor die ampsaanklagte teen oudregters John Hlophe en Nkola Motata, maar glo steeds die publiek se vertroue in die regbank bly sterk. Regter Piet Koen van die Hooggeregshof in KwaZulu-Natal, wat homself onttrek het aan oudpresident Jacob Zuma se korrupsie-verhoor, is nie aanbeveel nie.

# Die ACDP sê die Konstitusionele Hof se duidelike uitspraak oor oudpresident Jacob Zuma se verkiesbaarheid tot parlementslid in volgende week se verkiesing, was noodsaaklik. Die hof het beslis gegewe sy skuldigbevinding en vonnis vir minagting van die hof in 2021, mag hy eers vyf jaar ná die voltooiing van sy vonnis tot die Nasionale Vergadering verkies word. Steve Swart van die ACDP sê die hoogste hof het bevind die doel van Zuma se diskwalifisering is om die integriteit van Suid-Afrika se demokratiese regering te beskerm: KLANK: ENG SteveonZuma

# Die Nywerheidsgasverbruikersvereniging sê dapper, maar goedeurdagte besluite is nodig om so gou moontlik in gasenergie in Suid-Afrika te belê. Dit volg te midde van Sasol se beoogde verlaging in gasproduksie teen 2026. Dit kan tot ‘n potensiële gaskrisis lei en die land se ekonomie tot 500-miljard-rand per jaar kos. Jaco Human van die vereniging sê natuurlike gasoordrag ondersteun die land se program om van steenkool ontslae te raak: KLANK: ENG HumanOnGasUsage

# Iran se staatsmedia, IRNA, sê ʼn presidensiële verkiesing sal op 28 Junie gehou word ná die dood van die land se president, Ebrahim Raisi. Hy is in ʼn bergagtige gebied in die noordweste van Iran in ʼn helikopterongeluk dood. Die minister van Buitelandse Sake, Hossein Amir-Abdollahian, en sewe ander het ook omgekom. Iran se hoofleier, ayatollah Ali Khamenei, het vyf dae van rou afgekondig. Kenners glo die verkiesing sal waarskynlik oorhaastig gereël word met min kiesers wat deelneem. Raisi se begrafnis van drie dae begin vandag in Tabriz en verskuif vanmiddag na Qom.

# Gholf: Die wêreld se voorste speler, Scottie Scheffler, se hofverskyning is tot 3 Junie uitgestel. Die Amerikaner is verlede Vrydag kort voor sy tweede ronde in die PGA-kampioenskap in hegtenis geneem nadat hy deur swaar verkeer wat deur ‘n botsing veroorsaak is, by die Valhalla-gholfklub wou inry. Scheffler word onder meer aangekla van aanranding, roekelose bestuur en die verontagsaming van ‘n verkeersbeampte. Hy ontken alle klagtes teen hom.

# FINANSIES

===============

13:00

# Inkomstediens wil handel tussen SA en Oshoek-grenspos met Eswatini verbeter

# Business Leadership SA sê Nasionale Gesondheidsversekering bedreig Suid-Afrika se ambisie om ‘n sakekern in die streek te word

# Biden kritiseer Internasionale Strafhof-pogings om lasbrief vir Netanyahu te kry

# Die Suid-Afrikaanse Inkomstediens wil handel tussen Suid-Afrika en die Oshoek-grenspos met Eswatini verbeter. Die kommissaris van die SAID, Edward Kieswetter, sê na die uitreiking van die Tydvrystellingstudie die twee lande is op koers om bedryfsdoeltreffendheid te bereik. Die plan is om die wagtyd vir vrag van meer as ‘n uur en ‘n half te verminder tot tien-minute. Kieswetter is tevrede met die plan: KLANK: ENG-KieswetterOnStudy

Business Leadership SA sê die Nasionale Gesondheidsversekering sal die privaat en openbare gesondheidstelsels beskadig en ʼn geleentheid misloop om beter gesondheidsorg vir almal te bied. President Cyril Ramaphosa het die Wetsontwerp op Nasionale Gesondheidsversekering verlede week as wet bekragtig. Die organisasie se uitvoerende hoof, Busisiwe Mavuso, sê daar is eenvoudig geen fondse vir die NGV nie, en die tragedie is daar is wel werkbare maniere om universele gesondheidsorg te lewer. Mavuso sê die NGV bedreig die land se ambisie om ʼn streekskern vir sakeondernemings reg oor Afrika te word.

# Leiers van die Solidariteit-beweging het gister hul kommer uitgespreek oor die aantal omstrede wetgewing wat die laaste paar weke deur die regering deurgevoer is, maar ook ʼn boodskap deurgegee dat alles nie verlore is nie. Hulle verwag dat die president heel waarskynlik voor volgende week se kiesdag die omstrede Bela-wetgewing sal onderteken. Dít nadat hy verlede week die Nasionale Gesondheidsorg-wetgewing onderteken het. Die voorsitter van die Solidariteit-beweging, Flip Buys, sê alles is nie verlore nie en hulle op die toekoms ná die verkiesing. Hy moedig alle Suid-Afrikaners aan om volgende week te gaan stem. KLANK:

# Die Amerikaanse president, Joe Biden, beskryf die aanklaer van die Internasionale Strafhof se aansoek vir lasbriewe om Israel se eerste minister, Benjamin Netanyahu, en sy minister van Verdediging in hegtenis te neem, as verregaande. Die hof se hoofaanklaer, Karim Khan, versoek ook lasbriewe vir die inhegtenisneming van drie Hamas-leiers. Dit is vir vermeende oorlogsmisdade en misdade teen die mensdom in Israel en Gaza. Biden sê Israel doen alles in sy vermoë om burgerlikes te beskerm: KLANK: ENG BidenOnIsrael

# Sport: KLANK:

# FINANSIES

================

15:00

# Die Regterlike Dienskommissie voer onderhoud met adjunkhoofregter Maya vir hoofregterspos

# Mbalula sê ANC maak nie beloftes nie, maar gee ondernemings

# Rugby: SA Beker-eindstryd na Saterdag verskuif

# Die Regterlike Dienskommissie (RDK) voer tans ʼn onderhoud met die huidige adjunkhoofregter, Mandisa Maya, vir die pos van hoofregter. Dit is voor hoofregter Raymond Zondo se komende aftrede in Augustus. President Cyril Ramaphosa het Maya in Februarie as die enigste genomineerde voorgehou. Hy moet egter eers met die RDK konsulteer voordat hy haar kan aanstel. Die destydse president van die Hooggeregshof van Appèl, Maya, was laas die RDK se keuse vir die pos, maar die president het uiteindelik eerder die destydse adjunkhoofregter, Raymond Zondo, aangestel. Sy sê het nog nooit so hard gewerk as die afgelope 20 maande nie, waar sy moes aandag gee aan 400 appèlaansoeke. KLANK: ENG MayaOnCareer

# Die sekretaris-generaal van die ANC, Fikile Mbalula, sê die party het daarin geslaag om sedert 2019 90-persent van sy ondernemings vir ekonomiese groei, werkskepping en dienslewering na te kom. Die party voer die laaste week van sy veldtog vir die komende verkiesing op 29 Mei. Volgens Mbalula maak die ANC nie beloftes nie, maar gee ondernemings. Hy sê diegene wat beloftes maak, is nie in die regering nie: KLANK: ENG FikileonPromises

# Met ‘n week oor voor Suid-Afrika se algemene verkiesing is ‘n politieke ontleder, Dirk Kotzé, van mening dat kiesers reeds hul besluite geneem het en waarskynlik nie deur veldtogpogings op die nippertjie van plan sal verander nie. Dit volg nadat politieke partye die oorblywende dae voor die verkiesing spandeer om hul deur-tot-deur-veldtogte te verskerp en saamtrekke aan te bied. Kotzé meen op hierdie laat stadium kan veldtogte slegs kiesers se bestaande besluite bevestig en nie hul keuses verander nie.

# ‘n Gedenkdiens word vandag in die Lawaaikamp-gemeenskapsaal in George gehou vir die slagoffers van die gebou wat ingetuimel het. Vier-en-dertig mense is dood toe die gebou in aanbou sowat twee-weke gelede meegegee het. Nege mense is steeds in die hospitaal. Die Wes-Kaapse LUR vir Plaaslike Regering, Omgewingsake en Ontwikkelingsbeplanning, Anton Bredell, het Vrydag die bouterrein aan die Departement van Arbeid en die polisie oorhandig vir verdere ondersoeke. Meer as ‘n duisend reddingswerkers en vrywilligers het met die reddingsoperasie gehelp.

# Rugby: Die Airlink Pumas gaan kuier die naweek by die Griekwas in Kimberley om hulle die stryd aan te sê vir die eerste SA-beker eindstryd. Saru het gister in ‘n verklaring bevestig dat die spanne op die Suzuki Stadion sal ontmoet, met ‘n afskoptyd van halfeen die middag. Die wedstryd sou aanvanklik Vrydag beslis word, en dit is waarvolgens die Pumas afrigter Jimmy Stonehouse sy reisreëlings getref het. Die eindstryd is geskuif na Saterdag op versoek van die Griekwas, omdat byna geen toeskouers die wedstryd sou kon bywoon nie.

# Die rand verhandel teen 18-rand 13-sent teen die dollar, 19-rand 70-sent teen die euro en 23-rand 05-sent teen die pond. Bitcoin verhandel teen 71-duisend-311-dollar 46-sent. Die prys van goud is twee-duisend-419-dollar 53-sent per fynons en die prys van Brent ruolie 82-dollar 43-sent per vat.

==============

16:00

# Eskom verleng bedrywighede by Camden, Grootvlei en Hendrina tot 2030

# China maak beswaar by Amerika nadat Blinken nuwe Taiwanse president geluk wens

# Rugby: Nienaber sê Kampioenebeker-eindstryd tussen Leinster en Toulouse soos ‘n toets

# Eskom het die voortgesette bedrywighede by die Camden-, Grootvlei- en Hendrina-kragstasies in Mpumalanga tot 2030 goedgekeur, wat afwyk van die oorspronklike plan om eenhede teen 2027 uit diens te stel. Die hoof van kragopwekking, Bheki Nxumalo, sê die verlenging is om die netwerk bestendig te kry om nuwe vermoë by te voeg en om energiesekerheid te handhaaf te midde van ‘n voorsieningstekort. Die uitwerking op Suid-Afrika se dekarboniserings-verpligting en Billike Energie-oordrag Beleggingsplan bly onseker, met opdaterings wat in Junie verwag word oor die verminderingsteikens van uitstralings en die afsluiting van ander krageenhede.

# Adjunkhoofregter Mandisa Maya sê sy is meer vasbeslote as ooit tevore vir die rol as Hoofregter. Die enigste kandidaat word ondervra deur die Regterlike Dienskommissie. Maya is van mening die elf regters in die Konstitusionele Hof moet tot 15 vermeerder word. Sy vra vir grondwetlike wysigings om kleiner panele van regters toe te laat. Maya erken die posisie van Hoofregter is veeleisend, maar glo sy is geskik vir die pos: KLANK: ENG MayaOnReadiness

# Die jongste data in die derde week van Mei toon ‘n groot verlaging in brandstofpryse volgende maand. Volgens die Sentrale Energiefonds kan petrol- en dieselpryse met onderskeidelik 83 en 90 sent per liter daal. Dit is ongeveer 20 sent meer as middel van die maand se ramings. Die oorverhaling is as gevolg van laer globale oliepryse en ‘n sterker rand.

# Nuus uit die buiteland: China het by Amerika beswaar aangeteken omdat die minister van Buitelandse Sake, Anthony Blinken, die selfregerende Taiwan geluk gewens het na die inhuldiging van die nuwe president, Lai Ching-te. Lai is gister ingehuldig, maar Beijing het hom voorheen reeds as ‘n gevaarlike separatis gebrandmerk. Blinken het in sy gelukwensing gesê hy sien daarna uit dat Washington en Taipei vrede en bestendigheid in die ganse Straat van Taiwan handhaaf. Volgens Beijing is sy boodskap ‘n ernstige skending van die beginsel van Een China en stuur die verkeerde boodskap aan separatistiese magte.

# Rugby: Twee reuse van Europese rugby meet Saterdag kragte in die eindstryd van die Kampioenebeker. Die Ierse span, Leinster, speel teen die Franse klub, Toulouse, in die Tottenham Hotspur-stadion in Londen. Toulouse is die suksesvolste klub in die geskiedenis van die toernooi met vyf oorwinnings, terwyl Leinster die beker reeds vier keer ingepalm het. Die gewese Springbok-breier Jacques Nienaber is nou die senior afrigter van Leinster en verwag die intensiteit van ‘n toets in die eindstryd teen Toulouse: KLANK: ENG Jacques Nienaber

# Die rand verhandel teen 18-rand 13-sent teen die dollar, 19-rand 70-sent teen die euro en 23-rand 05-sent teen die pond. Bitcoin verhandel teen 71-duisend-335-dollar 91-sent. Die prys van goud is twee-duisend-419-dollar 54-sent per fynons en die prys van Brent ruolie 82-dollar 41-sent per vat.


×