Theresa Schoeman en Johan Coetzee met die Program Naweek
Spyskaart elke Vrydag om 15h00 tot 16h00.
Luister elke week na Naweek
Spyskaart met Theresa Schoeman en Johan Coetzee en 'n bespreking oor dit wat op die spyskaart vir die naweek is.
Al die genoemde resepte word getoets en geplaas na sorgvuldige
keuring deur Johan Schoeman, en jy kan verseker van 'n heerlike
smaak ervaring wees.
Hier is van die resepte waaroor hulle al gesels het:
DADEL-EN GRONDBOONTJIE BROSBLOKKIES
Nog ‘n lekkergoedresep wat seker altyd
‘n treffer sal bly. Ek maak hom sommer in die mikrogolfoond.
Gebruik ‘n mengbak was mikrogolf vriendelik
is.
Meng 100g Afgedopte Grondboonties (gehalveer
en verkieslik ongesout), 200g Suiker, 100ml Gouestroop en
2ml Sout saam.
Mikrogolf op Hoog vir 4 minute en roer tot
die suiker gesmelt het.
Mikrogolf weer op Hoog vir nog 3 minute.
Voeg 1 teelepel Vanieljegeursel, 125ml fyngekapte Dadels
en 25g Margarien by en roer goed.
Mikrogolf nou vir 2 minute, weer op Hoog.
Voeg 10ml Koeksoda by. Meng goed.
Die mengsel moet nou skuimerig wees.
Gooi nou die mengsel in ‘n gesmeerde
bakplaat. Maak mooi gelyk met ‘n houtlepel en laat afkoel tot
kliphard.
Breek in stukke. Onthou om die broslekkers
altyd in ‘n lugdigte houer te bêre.
Geniet! !
KLAPPERYS IN DIE MIKROGOLF
Gebruik ‘n mengbak was mikrogolf vriendelik
is.
Gooi 500g Suiker en 150ml Melk
saam in ‘n mengbak en kook op Hoog vir 8 minute. Roer die
mengsel gedurig tydens die kookproses. Die mengsel moet nou
lekker stroperig wees.
Voeg 200g Gedroogde Klapper by en
meng goed.
Skep HELFTE van die mensel in ‘n bakplaat
of oondpan van ongeveer 20cm x 20cm en maak mooi gelyk.
Kleur nou die ander helfte van die mengsel
met rooi of pienk voedselkleursel en smeer die pienk mengsel oor
die wit mengsel.
Laat afkoel en sny in blokkies !
Geniet! !
SJOKOLADE EN VANIELJE FUDGE.
Plaas 300ml Melk, 1 Blikkie Kondensmelk,
225g Margarien, 900g Suiker en 2ml Kremetart in ‘n
lekker groot pan. Kook die mengsel oor lae hitte tot die suiker
gesmelt het. Roer gedurig en moenie ongeduldig raak nie.
As die suiker HEELTEMAL gesmelt het, bring
tot kookpunt, kook vir omtrent 3 tot 5 minute, terwyl geroer
word. Die mengsel is reg as ‘n druppeltjie van die mengsel in
koue water laat val word en dadelik ‘n sagte balletjie vorm.
Haal mengsel van die plaat af en deel
gelykop in twee mengbakke.
Voeg 5ml Vanielje Geursel by die een
bak en 100g Gesmelte Sjokolade en ‘n paar druppels
Sjokolade Kleursel by die ander bak.
Klits nou gou altwee die mengsels tot die
mengsel dik is en ‘n effens growwe tekstuur het.
Gooi die Vanieljemengsel in ‘n oondbak en
maak gelyk. Gooi die Sjokolademengsel onmiddelik bo-op en maak
gelyk.
Waneer die Fudge amper gestol het sny in
blokkies en laat heeltemal afkoel.
Geniet! !
VRUGTEBLATJANG IN DIE MIKROGOLF.
Met geelperskes wat nou in seisoen kom
is dit ‘n lekker, vinnige bederfie om te maak.
Skil en ontpit Geelperskes en
Granny Smith Appels tot jy 1kg Perske en 1kg Appel
het. Kap ook 500g Uie fyn.
Meng bogenoemde Vrugte in ‘n
mikrogolfmengbak en bedek met Kleefplastiek. Kook die
mengsel vir 8 tot 10 minute tot die vrugte sag is. Verwyder uit
mikrogolf en hou eenkant.
Plaas die uie in ‘n mengbak en voeg
150ml Water by. Mikrogolf vir 6 minute op hoog tot uie sag
is. Dreineer die uie en voeg by die Vrugte.
Voeg nou 250ml Moutasyn, 3ml Gemaalde
Gemmer, 3ml Rooipeper en 5ml Mosterdpoeier, 5ml Neutmuskaat en
5ml Wonderpeper (“All Spice”), 4 Naeltjies en 5ml Sout
by die vrugtemengsel. Meng goed.
Mikrogolf nou op hoog vir 6 tot8 minute of
tot die mengsel kook. Mikrogolf nou die mengsel vir 30 minute
teen Meduim Krag. Roer gedurig.
Voeg nou nog 250ml Moutasyn, 125ml
Rosyne en 125ml Sagte Bruinsuiker by die mensel. Roer
goed.
Kook nou nog 30 minute op Meduim of tot dik.
Roer gedurig.
Giet nou in warm, droeë flesse en laat
afkoel voor die flesse geseël word.
Die resep lewer omtrent 3 x 500g flesse
blatjang.
Geniet! !
SPRINGMIELIESTROOP
Ek het ‘n lekker briefie van Annetjie
Naude ontvang waarin sy kla dat sy nie meer die resepte het van
tuisgemaakte lekkergoed wat hulle as kinders gemaak het nie. Sy
sê dit was altyd groot prêt oor naweke as hulle in die kombuis
gemors het. Sy het nou self kinders en wil hulle ook leer
lekkergoed maak.
Annetjie, ek glo daar is nog ouers soos
jy en daarom gaan ek oor die volgende paar weke ‘n paar ou
gunstelinge se resepte uitsaai.
My kinders het hierdie resep gereeld
gemaak en dikwels ekstra sakgeld verdien deur sakkies vol by die
skool te verkoop.
Kook 125ml Suiker, 60ml Water, 1
teelepel Vaniieljegeursel en 1 teelepel Koekkleursel saam
tot stroperig.
Gooi ‘n 2 liter roomysbak vol springmielies
in ‘n lekker groot mengbak. Gooi die stroop bo-oor en roer tot
die springmielies van mekaar begin los raak en die mengsel nie
meer stroperig is nie.
Die springmielies is so geurig, ons het dit
sommer uit die bak uit ge-eet.
Geniet!
!
SOET KAASNAGEREG.
Seker een van die maklikste, vinnigste
en goedkoopste nageregte wat jy ooit sal maak. Dis iets anders
en dis heerlik.
Meng 400g Ricottakaas met 2
Eiergele, 2 Eetlepels Suiker en 2 Eetlepels soet Sjerrie.
Die suiker kan met heuning vervang word.
Klits met ‘n handklitser tot glad en skep
in bakkies en plaas in yskas.
Garneer met iets groen en bedien koud saam
met soet beskuitjies.
Geniet! !
SJOKOLADE BALLETJIES.
Lekkergoed of Poeding. Besluit self.
Dankie aan Anne vir die resep.
Meng ½ Koppie Kondensmelk, 12,5ml Kakao
en 25g Botter saam in ‘n Pan. Oor ‘n lae hitte verwarm
die mengsel en roer tot alles goed gemeng is.
Haal die Pan van die plaat af en meng
140g Fyngemaakte Tennisbeskuitjies en 25g Fyngekapte
Droeë Appelkose by.
Rol die mengsel in Sjokoladevermicelli
of Droeë Klapper.
Plaas in Yskas.
Geniet! !
SARDYN TAMATIES.
‘n Lekker eenvoudige ekonomiese resep
wat vir ontbyt, midbyt, middagete ligte aandete of as bykos by
‘n braai. ‘n Moet in enige kombuis.
Kook 6 Eiers hard, dop af, en sny in
die helfte en skep die Gele uit.
Meng Gele met 1 x 410g Blik
Sardyne en 60g Margarien. Maak die mengsel fyn. Voeg
1 Teelepel Droeë Pietersielie of 3 Opgehoopte
Teelepels Vars Pietersielie, Swaetpeper na smaak. Ander
geurmiddels kan na smaak bygevoeg word maar oppas vir te veel
sout want die vis is klaar sout.
Vul Eiers met die mengsel.
Nou kom die ding ! Vir ontbyt of midbyt kan
die eier op ‘n skyfie Tamatie of ‘n Pynappelring geplaas word.
Vir Middag-of Aandete kan die eier op ‘n lekker ronde beskuitjie
geplaas word ens, ens.
Sprinkel Gerasperde Kaas Bo-oor en
en braai onder Rooster tot tot kaas gesmelt is.
Geniet! !
KERRIEVISPASTEI.
Die resep is amper soos Bobotie maar
het sy eie unieke lekker smaak. Smaak ook lekker as Snoek
gebruik word maar onthou om al die grate uit te haal.
Kook 400g tot 500g Witvis in water
tot gaar maar nie pap nie. Onthou die vis word nog gebak ook.
Skep die Vis uit en maak fyn. Hou die Water.
Week ‘n Dik (2,5cm) sny Witbrood in
die Viswater.
Braai 2 Gekerfde Uie tot sag. Voeg
12,5ml Kerriepoeier, 125ml Sultanas, 25ml Asyn, 125ml Water,
2 Eetlepels Apelkooskonfyt, 1 Teelepel gerasperde Suurlemoenskil
en Sout en Peper na smaak by. Laat prut tot dik
terwyl aanhoudend geroer word.
Druk Brood uit, maak fyn en voeg by
Vis. Meng Vis en Kerriesous goed met ‘n
vurk.
Plaas in ‘n gesmeerde oondskottel.
Klits 2 Eiers en 375ml Melk
saam. Giet oor Vis en bak @ 160ºC tot Melk gestol
is.
Geniet! !
GEMMERTERT
Een van my gunstelinge as kind. Heerlik,
soet en verleidelik. Ek het die wereld vol gesoek na ‘n
besonderse resep maar die beste bly maar die resep in SJA de
Villiers se Kook en Geniet. Hierdie resep het ek uit die drie-en
twintigste druk van Kook en Geniet wat in 1968 verskyn het
geleen. Ons het dit altyd saam met tee geniet maar deesdae sit
ek die tert, sonder die room, as bykos by as ons braai. Mans is
veral gek hieroor.
Maak ‘n bekuitjietertkors deur 1 Pakkie
Gemmerbeskuitjies te krummel en met 80g Gesmelte
Margarien te meng en onder en teen die kante van ‘n tertbak
vas te druk.
Meng 1 Koppie Gouestroop, 1 Koppie Water
en ½ Teelepel Fym Gemmer saam in ‘n kastrol. Verhit
en kook stadig vir ‘n paar minute. Voeg 2 eetlepels Gekerfde
Gemmerkonfyt by.
Meng 2 eetlepels Mielieblom en 1
eetlepel Vlapoeier in 2 eetlepels Koue Water en roer
by die stroopmengsel. Laat vir 3 minute kook om te verdik.
Gooi mengsel in jou tertkors en laat afkoel
om te verdik.
Versier met Styf geklitste room.
Geniet !
TUISGEMAAKTE MAYONAISE.
Gekoopte Mayonaise sal nooit so lekker
soos tuisgemaakte mayonnaise smaak nie en hoe meer jy oefen hoe
meer verskillende geure kan jy in jou mayonnaise inbring.
Klits 2 Eiergele; Knippie Sout en Peper;
12,5ml Witasyn (of suurlemoensap) en 3ml Mostertpoeier
saam tot dik. Voeg nou 375ml Olie druppelsgewys by terwyl
aanhoudend geklits word. As die olie te vinnig bygevoeg word sal
die mayonnaise skif. As die mayonnaise skif kan ‘n eiergeel met
sout en peper geklits word en dan druppelsgewys by die
mayonnaise geklits word.
As daar sowat 25ml olie bygevoeg is sal die
mengsel dik wees. Daarna kan die olie in ‘n dun eweredige
stroompie bygevoeg word solank daar aanhoudend geklits word.
As al die olie bygevoeg is kan nog asyn,
sout, peper, of mosterd bygevoeg word om jou unike smaak te
skep.
Plaas in Yskas.
Geniet! !
SUURLEMOENSLAAI.
Hierdie is nie ‘n slaai waarvan baie
mense bakke vol sal opeet nie maar is heerlik saam met ‘n ryk
vetterige dis soos bevoorbeeld Skilpaadjies (Lewer in Netvet) of
Pofadder. Die resep is ook net vir ‘n klein bakkie vol.
Skil en verwyder die wit membraam van 4
Suurlemoene. ( As jy Lemmietjies kan kry gebruik dit). Sny
die Suurlemoene in skyfies.
Rasper die Skil van 1 Groot
Lemoen oor die suurlemoen.
Druk die Sap van die lemoen oor die
Suurlemoen.
Gooi 2 Teelepels Bruinsuiker oor,
voeg ‘n halwe koppie Gedroogde Sultannas by en meng goed.
Laat staan in yskas oornag. Roer gedurig.
Geniet! !
ROMERIGE MOSSELSOUS VIR PASTA.
Die is een van daardie maklike resepte
wat lekker genoeg is om vir ‘n koning voor te sit. Enige pasta
is geskik maar ek verkies die Penne-noedels. Dis heerlik as die
sous so deur die noedel loop.
Kook 500g Pasta soos per
aanwysings op die pakkie.
Dreineer twee blikkies Gerookte Mossels
en hou die olie.
Braai een Ui en een teelepel
Gekapte Knoffel in die Mossels se Olie tot die ui sag en
deurskynend is.
Voeg 1 x 410g blik “Italian Style”
Tamaties en ’n handvol varsgekapte Pietersielie by en
prut vir 5minute.
Hier kom die belangrike deel. Van hier af
wil ons niks meer kook nie.
Draai die plaat waarop die sous prut af.
Die mossels is klaar gaar. As ons dit gaan kook gaan dit
pap word en ons wil ook nie die room kook nie.Voeg die 2
Blikkies Mossels en 125ml Room of Suurroom by.
Plaas deksel terug op pot en laat staan vir 5 minute sodat die
mossels warm kan word.
Gooi sous oor pasta en bedien dadelik.
Geniet! !
ERTJIESLAAI.
Ietsie anders. As jy nie Fetakaas het
nie gebruik Cheddarkaas. As jy nie Ham het nie gebruik gebraaide
Ontbytspek. As daar vars Pynappel in die yskas is, sny dit by.
Of Gekapte Neute, Of Piesangskywe. Die slaai hoef nooit twee
maal dieselfde te wees nie.
Ontdooi 1kg Gevriesde Ertjies en
plaas in bak. Ek gooi gewoonlik die ertjies in ‘n
vergiettes en laat koue kraanwater daaroor loop tot die ertjies
los is.
Kap 50g Kruisement (of Soetment as
jy het) fyn en roer deur Ertjies.
Sny 2 x Soetrissies in repies en
voeg by Ertjies. Ek gebruik gewoonlik ‘n rooi en ‘n geel rissie
vir kleur.
Sny 200g Fetakaas in blokkies en
voeg by.
Voeg 250g Ham wat in blokkies gesny
is by.
Sny 6 Gepiekiekelde Uitjies in
kwarte en voeg by.
Laastens. Breek genoeg Slaaiblare
fyn om die volume van die slaai te verdubbel.
Meng goed en bedek met ‘n slaaisous wat jy
maak deur 3 Eetlepels Kondensmelk, 3 Eetlepels Mayonaise, 5
Eetlepels Agurkiesous en 5 Eetlepels Melk saam te
meng
Plaas in Yskas. Bedien koud.
Geniet! !
DROEËVRUGTESLAAI.
Droeëvrugte kan soms duur wees maar die
slaai is vullend en met so ‘n bak kom mens ver.
Week 1kg Gemengde Dreoëvrugte vir ‘n
uur in kouewater.
Kook die vrugte tot sag en laat afkoel en
sny in stukke.
Maak intussen die slaaisous deur 1 Klein
Blikkie Ingedampte Melk styf te klits. Vou ‘n Blikkie
Kondensmelk by die Melk in en roer dan 125ml Asyn, 125 ml
Olie en 15 ml Aangemaakte Mosterd by. Laat staan om
dik te word.
Sny 8 Piesangs in skywe.
Pak nou ‘n laag Vrugte, ‘n laag Piesangs ‘n
lag Gekapte Neute ‘n lag Sous en herhaal tot bak vol is.
Bedien koud.
Geniet! !
KERIEPERSKE EN PIESANGSLAAI.
‘N Ou tradisionele slaai wat deur die
jare ‘n gunsteling gebly het. Daar is baie variasies op die
slaai maar ek verkies hierdie basiese weergawe.
Dreineer ‘n 410g Blik Gesnyde
Geelperskes en hou die stroop.
Sny ‘n lekker Groot Ui in ringe en
braai tot deurskynend.
Voeg nou die Perskestroop, 15ml
Kerriepoeier, 10 ml Appelkooskonfyt, 10ml Wynasyn en ‘n
Knippiesout by die uie en prut vir so 5 minute.
Sny 4 – 5 Piesangs in skywe en voeg
dit saam met die Perskes in die sous. Maak ‘n Halwe Teelepel
Mielieblom in bietjie water aan en voeg by sous. Kook die
mengsel tot sous verdik, haal van plaat af en laat afkoel.
Skep in Slaaibak en garner met
Kruisementblare.
Plaas in yskas en bedien koud.
Geniet! !
VEELDOELIGE BRUINLENSIE SLAAI
Hierdie is ‘n maklike, ekonomiese maar
veeldoelige slaai. Lensies is ook baie gesond. Hierdie slaai kan
net so voorgesit word of deur tuna, hoenderblokkies, ham of
sommer van die oorskiet braaivleis by te meng word dit ‘n
heerlike ligte middagete Die resep maak ‘n groot bak slaai. Mens
kan net halfte van die gaar lensies gebruik en later ‘n ander
variasie maak. Om die slaai ‘n tropiese geur te gee kan fyn
pynappel bygevoeg word of vir ‘n Meksikaanse geur kan rooirissie
by gevoeg word. Die slaai kan sommer ‘n hele paar dae in die
yskas gebêre word.
Los 2 Blokkies Hoenderaftreksel in
1,25 liter Water op. Voeg 1 Teelepel Gekneusde Knofeel
by. Indien jy nie Aftreksel het nie kan jy dit in water kook
maar dan moet jy Sout byvoeg.
Voeg 500g Bruinlensies by en kook
vir omtent 30 tot 45 minute. Toets gedurig. Die lensies moet
gaar maar NIE pap wees nie.
Waneer reg, dreineer en laat afkoel.
Gooi nou die Lensies in ‘n slaaibak en gooi
4 – 5 eetlepels Olyfolie op. Gebruik jou hande en meng
die Lensies en Olyfolie goed. Die lensies moet sommer so lekker
blink.
Sny nou 200g Fetakaas, ‘n Halwe
Botteltjie Peppadew en so 4 Groot Agurkies op in
klein stukkies. Meng dit by die lensies.
Skep nou so 3 Eetlepeels van die Peppedew
en 2 Eetlepels van die Agurkies se sous oor en gooi ‘n goeie
klompie Varsgemaalde Swartpeper by. Meng goed en laat in
yskas koud word.
Garneer met fyn Fetakaas en
Pietersielietakkies.
Geniet!
!
Marinade vir Vark of Hoender.
Meng die volgende bestandele goed saam:
-
30 ml Heuning
-
30ml Soyasous
-
5ml
Worcestershiresous
-
5ml Skerp Rissiesous
-
10 ml Tamatiesous
-
10ml Suurlemoensap
-
100ml Droeë Witwyn
(of Wynasyn)
Marineer die vleis vir ‘n paar uur in die marinade. Die marinade
ka nook as ‘n bedrupsous gebruik word. Dalk kan jy dan so ‘n
eetlepel Blatjang byvoeg.
Geniet !!!
Malle Malvalekker Slaai.
Ek het die
resep eendag erens op die internet raak geloop. Ek het nooit
gedink dit kan werk nie en hom dus nooit gemaak nie. Iemand
praat toe nou die dag oor die resep wat so lekker is en toe maak
ek hom. Dis soos hulle sê.
Jy kan nie besluit of dit slaai of poeding is nie maar dis
heerlik saam met braaivleis en dis so maklik om te maak.
Dreineer ‘n 440g
Fyn Pynappel
en gooi die sous in
‘n mengbak.
Sny 2 x 150g pakkies Malvalekkers in kwarte in die
pynappelsous in. Vryf elke stukke malvalekker met die sous om te
voorkom dat die stukkies aan mekaar vas sit.
Voeg
nou die Pynappel en 175ml Grenadella Joghurt by en meng
goed.
Die gereg kan dae vooruit gemaak word en smaak op sy beste na
twee of drie dae.
Geniet !!!
Veeldoelige Warm Sampioengereg.
Hierdie is
een van daardie resepte wat mens moet hê. Die gereg kan of as ‘n
warm slaai of as ‘n bykos by ‘n braai of as ‘n pastasous gebruik
word. Vir variasie kan ‘n blik pynappelstukke in plaas van
sultanas gebruik word. As die sous vir ‘n pastasous gebruik word
kan gebraaide ontbytspek en ekstra room bygevoeg word. As die
gereg by ‘n braai geniet gaan word kan ‘n swartpot gebruik word
en sommer eenkant op die vuur gaargemaak word.
Sny
500g Vars Knopiesampioene in kwarte en plaas in swartpot
of oondbak. Voeg 125g Sultanas by en meng.
Meng nou
40g sagte Margarien, 50ml Koekmeelblom, 1 Fyngekapte ui, Halwe
Gekapte Soetrissie, 5ml Droeë Pietersielie, 2ml Rooipeper, 5ml
Suurlemoenpeper en 5ml aangemaakte Mosterd saam. Smeer die
mengsel oor jou Sampioene.
Giet
250ml Room bo-oor.
Bak in oond
@ 180ºC vir ± 30 minute of prut op vuur vir 20 minute. Roer so
af en toe.
LET WEL:
Omdat die sampioene water trek
kan die gereg soms baie loperig wees. Maak die sous dik
met bietjie Mielieblom.
Geniet !!!
KARRINGMELK-KNOFFELBROOD.
‘n
Maklike Broodjie wat anders is. Lekker saam met enige gereg en
spesiaal waneer dit gerooster word vir ontbyd. Die Broodjie
vries ook lekker.
Meng 750ml Bruismeel met
- 10ml Gekneusde Knoffel
- 5ml Origanum
- 5ml Marjolyn
- 10ml Gedroogde Pietersielie
- 5ml Tiemie
- 5ml Sout
Klits nou 1 x Eier en voeg dit by
500ml Karringmelk.
Meng Karringmelk mengsel by Droeë
Bestanddele om ‘n deeg te vorm en gooi in gesmeerde Broodpan.
Strooi ‘n dik laag gerasperde Kaas
oor.
Bak vir ± 60 minute @ 180ºC.
GENIET
! ! !
DROOMDIS.
‘n Heerlike vinnige dis wat kan dien as
‘n ligte middagete of as bykos by ‘n braai.
Kook 250g Pasta van jou keuse gaar
soos per aanwysings op die pakkie. Dreineer, en plaas in mengbak.
Voeg nou 150ml Olie en 1 x 410g Blikkie Pitmielies
by.
Braai intussen ‘n Halwe Soetrissie, 1
Ui en 125g (halwe Pakkie) Ontbytspek tot lekker bros.
Voeg dit by die Pasta Mengsel.
Meng 1 x Pakkie Samioensoppoeier met
200ml water en voeg 1 x Blikkie Sampioene en 1 x
Koppie Gevriesde Bone of Gevriesde Ertjies by. Kook die
mengsel vir so 15 Minute. As die mengsel te dik word verdun dit
met Melk.
Meng die Sopmengsel by die
Pastamengsel. Skep dit dan in ‘n vuurvaste oondbak en sprinkel
250ml (200g) Gerasperde Kaas bo-oor.
Bak teen 180ºC vir ongeveer 15 minute of
tot kaas lekker gesmelt is
GENIET ! ! !
TJOKOLADE-KOFFIEKOEK.
Ek
het hierdie ongelooflike resep van Engela Coetzee ontvang. Dit
is soos sy sê “Die Beste”.
Skei 9 Eiers. Klits die Witte
styf en hou eenkant. Hou Gele van eiers eenkant.
Sif die volgende bestandele in ‘n bak saam.
2¼
Koppies Koekmeel, 2¼
Koppies Suiker, 4½
Eetlepels Kakao, 4½
Teelepels Bakpoeier en 3¼
Teelepels Sout.
Klits nou die volgende in ‘n groot
mengbak saam.
1¼
Koppie Warm Water (nie kookwater nie) en 1¼
Koppie Olie.
Meng stadig ‘n derde van die droeë
bestandele by die Olie/Water-mengsel in en meng dan die
Eiergele by.
Meng nou nog ‘n derde van die droeë
bestandele in en meng dan die styfgeklitse Eierwitte
by.
Meng nou die res van die droeë
bestandele en 1½
Teelepel Vanilla Essens by en meng goed deur. Moenie die
bestandele te lank klits nie.
Gooi in gesmeerde koekpan en bak vir 30
minute na 1 uur (afhangende van die diepte van die koekpan)
@ 180ºC.
Maak nou die volgende stroop aan.
Kook 1½
Koppie Suiker, 1½ Koppie
Water, 1½ Teelepel
Vanilla Essens en 5 Eetlepels kits Koffiepoeier saam.
Gooi die stroop dadelik oor die koek as dit
uitkom. Druk gaatjies met ‘n vurk in die koek sodat die stroop
lekker diep kan intrek.
Vir versiering meng 1 blik Karamel
Kondensmelk met 2 Bakkies Room en smeer oor koek.
Geniet
dit ! ! ! !
EISBEIN (KROEK) POTJIE
Neem 2 Eisbeins van ongeveer
800 g elk en braai in bietjie Botter in ‘n warm pot tot
die vleissappe begin uitbraai. Ons het genoeg vleissap nodig om
uie in te braai.
Verwyder vleis uit pot en braai 4 uie
wat in kwarte gesny is in die vet-sappe tot deurskynend. Sny
4 Wortels in happie-groote stukkies en braai saam met uie
vir 2 minute.
Voeg 2 Soetrissies (rooi of geel
met groen vir kleur) wat in 1 cm stukke gesny is en 1
gekneusde knoffelhuisie by uiemengsel en braai vir 5 minute
om ‘n lekkker geurige basis te kry.
Voeg 1 Blikkie Bier (340ml) en
340ml Vleisaftreksel by.
Plaas vleis terug in pot en prut vir 1 uur.
Voeg nou 4 Aartappels wat in stukke
gesny is, 2 Seldery stingels opgesny, Sout en Peper
na smaak en 1 teelepel Mosterdpoeier aangemaak in bietjie
Asyn by.
Bedek die hele spul met die blare van ‘n
Halwe Kopkool. Die koolblare moet soos ‘n seël oor die vleis
wees. Sit deksel op en prut vir 2 ure.
GENIET ! ! !.
