Hier is van die resepte waaroor hulle al gesels het:

18/06/10   

GARNAALSLAAI.

Die resep is baie eenvoudig en kan ook as ‘n lekker voorgereg voorgesit word. 

Kook 300g Spinasie en Broccoli tot gaar. Voeg 400g Gevriesde “peeled prawns” 3 minute voor die einde van die kooktyd by en kook tot pienk. Gooi in ‘n vergietes en spoel onder lopende koue water af om dit weer te verfris. Skud tot goed droog en gooi in mengbak. 

Voeg nou 100g gekapte neute, 1 bossie gekapte Grasuie, 1 meduim groote Avokadopeer wat in blokkies gesny is en ‘n teelepel sout by. 

Kap so ongeveer 50 ml Koriander baie fyn en meng 5ml matige Kerriepoeier by. Roer nou die mengsel by 125ml Griekse Jogurt. 

Roer die slaaisous by Garnale en bedien op slaaiblare.

Geniet !!!

25/06/10           

BIERBROOD IN BLIKKIES. 

Sny 4 x 410g blikkies oop sodat daar nie skerp rante is nie. Verwyder etikette smeer goed en sit ‘n sirkeltjie gesmeerde bakpapier onder in. 

Gooi die volgende in ‘n mengbak:

500g (1 pakkie) Bruismeel.

2 eetlepels Suiker

1 teelepel gedroogte pietersielie

1 teelepel gedroogde Italiaanse Kruie

1 teelepel sout

Fyngekapte songedroogde tamaties en / of rosyntjies

Blokkies Mozarella of Cheddarkaas. 

Voeg 1 Blikkie bier by en meng tot ‘n stywe deeg. Indien nodig kan jy nog water byvoeg. 

Deel jou deeg in 4 gelyke dele. Vul elke blikkie. Die blikkie moet net ¾ vol wees want die deeg rys. 

Bak vir 30 minute @ 180ºC. 

Geniet !!!

18/06/10    

NELMARIE SE “MOERBY” GEREG.

Kook 2 pakkies “2 Minute Noodles” vir 5 minute tot gaar en hou eenkant.

Braai intussen 2 lekker groot gekapte Uie tot sag. Gooi nou die uie by die Noedels 

Voeg nou

3 eetlepels Blatjang

2 eetlepels Soet Rissiesous

2 blikkies Tuna

en

1 koppie Kaas by. 

Roer alles goed deurmekaar en gooi in ‘n gesmeerde oondskottel en maak mooi gelyk. 

Maak nou ‘n slapkorsdeeg deur 3 eiers en ½ koppie saam te klits. Roer nou 2 hoogvol koppies koekmeel by. Gooi die deeg oor die tert en bak vir 30 minute @ 180ºC of tot gestol. 

Geniet !!!

18/06/10

GEURIGE BEESVLEIS.

Vinnig en maklik met ‘n unieke smaak. Kan op rys, as ‘n pastasous of ‘n vulsel vir ‘n aartappel gebruik word. 

Vir jou vleis beveel ek ‘n goeie snit aan wat in repies gesny word maar as jy mooi stowevleis in die hande kan kry kan jy die stowevleis in blokkies sny. Oppas net vir te veel vet. Swakker snitte moet ook langer prut om die vleis sag te kry.

Braai sowat 750g beesvleis, repies of blokkies tot bruin en goed geseël aan alkant.

Braai 2 gekapte uie, 1 gekapte Soetrissie en 2 teelepeltjies gekapte knoffel in dieselfde olie en sappe vir ‘n paar minute.

Strooi nou 2 teelepels Mielieblom oor en roer tot die mielieblom geabsorbeer is. 

Voeg nou 1 blik Klappermelk (410g), 3 eetlepels grondboontjiebotter en 2 eetlepels baie fyn gekapte koljanderblare by en geur na smaak. 

Bring tot kookpunt en prut 15 minute met die deksel op en dan nog 10 minute sonder die deksel. 

Bedien warm saam met rys, pasta of gebakte aartappel. 

25/06/10 BOTTERSKORSIE EN BILTONGSOP.

Gooi die volgende in ‘n pot.

2 Gekapte Uie,

2 Gekapte Knoffelhuisies,

3 Granny Smith appels geskil en in blokkies gesny,

2 Meduim geskilde aartappels in blokkies gesny,

2 Botterskorsies, geskil en in blokkies gesny,

½ teelepel Kerriepoeier, sout en peper

en

2 Hoenderaftrekselblokkies opgelos in 750ml water. 

Kook alles saam tot gaar en sag. Jy kan die sop fynmaak met jou kapokaartappelmaker indien jy van ‘n van ‘n fyner sop hou. 

Voeg 100ml Bulgaarse Jogurt by net voor opdiening. 

Geniet !!!

25/06/10        BILTONGSOP. 

Begin deur ‘n Biltongaftreksel te maak. Indien jy haastig is kan jy beesvleisaftreksel van ‘n blokkie maak maar die smaak is nie dieselfde nie. 

Neem ‘n stuk nat beesbiltong – sonder vet- wat so 8cm lank is, rasper dit fyn en voeg 1,5 liter water by. Prut met die deksel op vir 30 -45 minute. 

Smelt 125g Botter of Bakmargarien in ‘n pan voeg 1¼ koppie koekmeel by en roerbraai vir so 3 minute. Voeg nou 2 koppies Melk bietjies bietjies by en bring tot kookpunt. Hou aan roer om klonte te vermy. 

Voeg nou jou aftreksel, ¼ teelepel neutmuskaat, ¼ teelepel koljander en ‘n ¼ teelepel kaneel by ( Jy kan al die bogenoemde bestandele vervang met ‘n ¾ teelepel Wonderpeper [“All Spice”].)  

Sny nou jou biltong ‘n dun skywe en sny dan elke skyfie in drie. Ek sê altyd ek verkies twee klein stukkies biltong op my lepel as een groot stuk wat oor die rant hang maar smaak verskil. Jy kan ook biltongpoeier gebruik maar ek verkies die stukkies.

Jy het omrtent (na smaak) 1 koppie biltong nodig. Voeg nou die biltong, 200ml Room en 50ml Sjerrie – daai ou bruines -  by en bring stadig tot kookpunt. Laat prut vir 10 minute, voeg ¾ koppie blou- of cheddarkaas by en verwyder van hite.

 Bedien saam met tuisgemaakte brood.

04/06/10   

WILDEBEESKASTAIINGS. 

Maak gou die deeg.

Sif 300g Koekmeelblom, 12,5ml Bakpoeier en 2ml Sout saam.

Frummel 2 eetlepels sagte Botter in die meel in. Dit moet soos sagte broodkrummels lyk.

Klits 2 Eiers en 200ml Melk saam en roer dit by die meelmengsel om ‘n deeg te vorm. As die deeg te styf is kan jy bietjie melk by roer.

Deel die deeg in 6 gelyke dele.

Rol elke blokkie deeg uit na 20cm x 30 cm. Dis omtrent die grote van ‘n broodplank. Die deeg moet lekker dun wees.

Smeer gesmelte Botter of Bakmargarien op die deeg en sif ‘n lagie meelblom oor.

Pak al 6 velle opmekaar.

Rol nou die 6 lae uit tot 30cm x 40cm, of selfs bietjie groter. Die deeg moet lekker dun wees.

Rol nou die deeg in die lengte styf op om ‘n lang wors te vorm. Maak seker die punte van die wors is goed vas sodat dit nie afrol as dit gebraai word nie.

Sny nou die wors in 2cm skyfies.

Braai ‘n paar op ‘n slag in matige diep Olie en druk dit in die stroop. Laat die olie eers weer warm word voor die volgende wielietjies in gesit word anders suig die deeg olie. 

HIER VERSKIL MENSE. DIE MALEIERS SÊ DIE STROOP MOET WARM WEES ANDER MENSE VERKIES WEER KOUE STROOP. BESLUIT SELF.  

Die stroop.

Smelt 1 koppie Suiker in 1 koppie Water, 10 ml Suurlemoensap en 25ml Gouestroop oor matige hitte. Kook dan vir 7 minute weer oor matige hitte tot die stroop begin dik word. Ek is baie life om 1 teelepel gerasperde Naartjieskil ook by te voeg. 

Geniet !!!

04/06/10 

STORMJAERS. 

Sif 4 koppies Koekmeel, 15ml Bakpoeier en 1 teelepel Sout saam.

Klits 3 Eiers en 1 koppie Suiker saam en klits dan 375ml(1½ koppies) melk stadig by. Roer 250g Rosyntjies in en roer dan die meelmengsel by om ‘n deeg te vorm. 

Skep teelepels vol in matige diep olie en braai aan die eenkant tot bruin en draai dan die koekie om en braai die anderkant tot bruin. 

Skep uit en sif versiersuiker oor.  

Geniet !!!

21/05/10 

PASTA VAN SPINASIESTINGELS.

Ons gooi gewoonlik die wit stingels van spinasie weg maar ons voorouers het in die maar jare niks weggegooi nie. Die pasta resep is ontwikkel uit ‘n groente gereg uit.

 Neem die stingels van 1 bossie Spinasie en sny fyn.

 Braai die stingels nou saam met 2 gekapte uie en 250g Ontbytspek of Hoenderborsies in bietjie botter. Waneer amper gaar roer so ‘n lepel meelbom by en braai tot bottersous dik is.

 Voeg nou of room of ‘n pakkie pastasous wat aangemeek is by.

Vinnig maar lekker !

Geniet !!!

21/05/10

MIELIEPAPBALLE.

Die resep is baie veelsydig. Deur verskillende geure blikkies tamaties, verskillende geure soppoeier en met kaas en verbeelding te speel tower jy elke keer ‘n nuwe wenner op.

Maak slapperige stywepap.

Voeg 1 blik Heelpitmieleis, 1 Eetlepel Botter of Bakmargarien en 200g baie fyn gekapte Biltong by. (I.p.v. biltong kan fyn gekapte grondboontjies bygevoeg word)

Laat effens afkoel.

Maak nou ‘n sous deur:

1 blikkie Tamatiesmoor of gegeurde fyngekapte Tamaties en ‘n gekapte ui,

200g gesnyde Sampioene of 1 groot blik Ingemaakte Sampioene en 1 pakkie of Sampioenroomsop of Tamatieroomsop of Beesstertsop, aangemaak volgens die aanwysings op die pakkie, by. Vervang halfte van die water met Melk om die sous romeriger te maak.

Geur met Peper en kook vir 10 minute.

Vorm nou balletjies van die pap en plaas hulle in ‘n gesmeerde oondskottel. Gooi die sous oor en bak vir 20 minute @ 180 º C.

Vir ekstra smaak kan Kaas oor gerasper word.

Geniet !!!

21/05/10

 Maak ‘n kors deur 1 pakkie Mariebeskuitjies wat fyn gemaak is met 65g gesmelte botter te meng en teen jou terbak se binnekant vas te druk.

Skei 3 eiers.

Voeg die Eiergele by 1 blik Kondensmelk, 150ml Suurlemoensap en 5 druppels Vanieljegeursel. Klits goed saam.

Klits nou die Eierwitte styf en vou by mengsel in. Skep in tertkors en bak vir 15 – 20 minute @ 180º C.

Geniet !!!

21/05/10

LEMOENSLAAI.

 Skil 6 tot8 Lemoene (afhangend van die grote van die lemoene) en verwyder die wit.

Sny nou die Lemoene in 3 of 4 dik skywe en dan weer in kwarte of nog kleiner. Verwyder die pitte terwyl jy sny. Werk oor ‘n bak want die sous wat mors will ons nou nou gebruik.

Pak die lemoene in lae en strooi suiker oor elke laag. Die lemoene wil minstens ‘n halfuur so in die suiker week. Hoe langer hoe beter.

 Maak intussen die sous.

Kook 175ml water en 2 eetlepels Botter of Bakmargarien daarby in.

Maak 30ml Vlapoeier in bietjie water aan en as die water lekker vinnig kook roer dir vlapoeier vinnig by en roer dadelik om klonte te voorkom.

Voeg nou 5 druppels Vanieljegeursel en 2 eetlepels Kondensmelk by en kook tot sous lekker styf is. Begin eers met net een lepel Kondensmelk en hou aan proe tot jy die regte smaak het. Die sous is reg as jy nie of Vla of Kondensmelk kan proe nie. Die geheim is mense moet nie kan raai wat in die sous is nie.

Skep nou die sap wat gemors het en die lemoen/suikersous wat onder in die lemoene lê by.

Roer goed deur, laat effens afkoel en gooi oor lemoene. Plaas in yskas en bedien koud.

 Geniet !!!

21/05/10 

UITPAK-GROENTE GEREG.

Die geheim van die gereg is die verskillende vorm, tekstuur en smaak van elke groente. Dis eintlik 4 disse in een bak.

Die lekker van die gereg is dat alles vooraf berei kan word en dan net voor opdiening warm gemaak word.

 Die hoeveelhede sal natuurlik van die aantal mense afhang.

 Neem 1 eiervrug skil, sny in in skywe, gooi sout oor en laat halfuur lê. Spoel goed af onder lopende water, druk droog en braai in bietjie olie of botter tot bruin en gaar en sit op kombuispapier. Smeer elke skyf met ‘n lekker lagie Soetrissiesous.

Sny jou murgpampoentjies in lang repe en braai in bietjie botter tot amper gaar. Jy wil nie pap groente hê nie. Sprinkel bietjie ‘geelsout’ of kaneelsuiker oor.

Sny jou patats in vingers – soos vir aarappelskyfies en roerbraai in bietjie botter tot gaar en mooi bruin. Gooi bietjie heuning oor.

Sny Sampioene in die halfte en braai in bietjie knoffelbotter tot bruin en gaar.

Pak jou groent uit op ‘n platbord en maak warm voor jy dit wil bedien. Garneer die bord met tamatieskywe, gekookte eier wat in wiele gesny is en pietersielietakkies.

Die verskillende kleure van die garneering is belangrik want die groente is almal maar effens bruinerig. Pak sommer ‘n paar kappertjie blomme of enige helder kleur blom op die bord.

Geniet !!!

12/03/10 

SKELVISTERT. 

Rol ‘n vel gekoopte deeg wat ontdooi is dun uit. Plaas in ‘n gemeerde tertbak, prik die deeg baie goed met ‘n vurk om te keer dat die deeg rys.

Bak die kors vir 20 minute @ 180ºC. 

Kook 600g Skelvis in melk vir 7 minute tot gaar.

Vlok die vis.

Klits 4 Eiers, 250ml Room, ‘n handvol gekapte Pietersielie, Swartpeper en Roosmaryn-en Olyfspesery saam.

Voeg die vis by.

Gooi die mengsel in die kors en bak @ 180ºC vir 20 minute of tot die eier gestol is.

Rasper bietjie kaas oor 5 minute voor die tert uit die oond kom. 

Geniet !!!

12/03/10 

SKELVIS MET WYN-EN KAASSOUS. 

Kook 750g Skelvis in water vir sowat 7minute. Dreineer en hou 150ml van die water vir die kaassous.

Maak nou die kaas-en wynsous. 

Voeg 200ml Droeë Witwyn by die 150ml water waarin die vis gekook is.

Smelt 30ml Botter in ‘n pan.

Voeg 30 ml Meelblom by en roer deeglik.

Voeg die vloeistof bietjies bietjies by terwyl gedurig geroer word.

Waneer die sous lekker dik is stel die hitte af en voeg 1 Koppie gerasperde Cheddarkaas, 50ml Parmesaankaas, 1 teelepel Gerasperde Suurlemoenskil, 1 teelepel Mosterdpoeier, 1 teelepel Gedroogte Pietersielie en ‘n stywe knippie Rooipeper by.

Roer goed deur.

Plaas nou die vis netjies onder in ‘n gesmeerde oondskottel. Skep die sous bo-oor.

Bak vir 10 minute @180ºC.

Sprinkel ½ koppie varsbroodkrummelsbo-oor en plaas onder die rooster tot goudbruin. 

Geniet !!!

05/03/10

SKELVIS MET KAPOKAARTAPPELPASTEI. 

Kook 6 Aartappels tot gaar en skil. Maak fyn met bietjie melk en botter. 

Kook 600g Skelvis in 250ml Melk tot vis gaar is. Hou die melk.

Breek die vis in stukkies en meng met 1 koppie gevriesde Ertjies. 

Smelt 20ml Botter in die pan. Roer 20ml Koekmeel by en roer tot goed gemeng. Roer die melk waarin die vis gekook is by terwyl gedurig geroer word. Geur met Pietersielie en Paprika. 

Plaas vis-en ertjie mengsel onder in ‘n oondvaste bak.

Skep die sous bo-oor.

Bedek met kapokaartappels. 

Bak @ 180ºC vir ‘n paar minute tot goudbruin. 

Geniet !!!

12/02/10/ 

KORSLOSE HOENDERPASTEI MET CHIPS.

Hierdie is net ‘n basiese resep. Groente of wat in die kaas is kan bygevoeg word en geurmiddels moet elkeen maar byvoeg na smaak. Ek is baie lief om bietjie Rooipeper by te voeg. 

Kook ongeveer 1,5kg Hoender gaar in soutwater. Ontbeen en sny in blokkies. Hou die aftreksel.

Kook 2 Eiers hard, dop af en sny fyn.

Druk twee klein pakkies aartappelskyfies fyn.

Maak ‘n pakkie Sampioensoppoeier aan soos per instruksies op die pakkie maar gebruik halfte melk en halfte water.

Kap 1 of 2 Uie fyn en braai met ‘n pakkie sampioene tot net gaar. 

Nou is die harde werk klaar. 

Meng nou al die boonste bestandele saam en voeg daarby:

1 koppie gaar Rys.

1 koppie gevriesde Ertjies of Mielies.

1 blikkie Sampioenroomsop of 1 koppie Mayonaise.

1 of 2 stingels Seldery wat goed gestring is. 

Plaas nou die mengsel in ‘n oondbak. Indien die mengsel baie droog is voeg van die hoenderaftreksel by. 

Die pastei kan op die stadium net so gevries word. 

Pak ‘n lekker laag gerasperde kaas bo-op en bak vir 10 – 15 minute @ 200º C  

NS.

Ø  Ek het die pastei al gevries nadat hy gebak is. Hy was bietjie waterig nadat hy ontdooi het maar was heel eetbaar.

Ø  Die pastei kan natuurlik baie maklik in induviduele porsies gemaak word. 

Geniet !!!

05/03/10/ 

HEUNING EN LEMOENPATATS.

 Hierdie resep werk op sy beste met lekker groot patats.

 As jy wil kan jy die patats met ‘n groenteskiller skil maar ek skrop die patats net bietjie met ‘n potskuurder.

Sny die patats nou in lekker dik skywe of as dit kleinerige patas is net middeldeur in die lengte af en rangskik die patats dan in ‘n gesmeerde oondskottel. 

Smelt nou 2 Eetlepels Botter of Bakmargarien en voeg ‘n ½ Koppie Heuning by en meng goed. Voeg nou ‘n ¼ Koppie Lemoensap en 2 Eetlepels Brandewyn by en gooi die sous oor die patats.

Sprinkel fyn gemmer en bietjie sout oor die patats.

Bak vir sowat ‘n uur of tot patats gaar is by 160ºC. Terwyl die patats bak skep mens die hele tyd van die sous oor die patats. 

Geniet !!!

05/03/10

CHAKALAKA.

 Sy ‘n lekker groot ui in skyfies.

Kerf ‘n kleinerige koolkop baie fyn.

Rasper 2 of 3 Wortels lekker grof.

Sny 2 Groen Soetrissies in repies.

Sny 2 blikke gekapte Tamaties oop. 

Braai die uie in bietjie olie en voeg 2ml peri-peri, 1 Teelepel Paprika en 1 Teelepel Kerriepoeier by.

Voeg kool, wortel en soetrissie by en braai tot alles begin sag word.

Voeg dan die Tamaties en 50 ml Witasyn en 3 Teelepels Suiker by. 

Prut vir 5 minute. Proe maar en gooi smaakmiddels van jou keuse soos bv. knoffel of mosterd by. 

Geniet !!!

05/03/10 

BOTTERKOOL.

 Snipper ‘n midelmatige koolkop fyn en blanseer in kookwater met sout in. Die kool moet nog bros wees.

Dreineer die kool en hou 1 koppie water vir die sous.

Gooi die water in ‘n pan en voeg 4 eetlepels botter of bakmargarien by. Voeg nou 1 opgehoopte eetlepel meelblom en ‘n ¼ koppie melk by en roer. Bring tot kookpunt terwyl aanhoudend geroer word. Waneer die sous lekker dik is voeg die kool by en laat deurkook.

Sprinkel bietjie neutmuskaat of anys oor. 

Geniet !!!

26/02/10/

KAASSOUS VIR GROOT SAMPIOENE. 

Vee die sampioene goed af. 

Plaas die volgende bestandele in ‘n mengbak.

Ø  1 Bakkie Maaskaas – ek hou van die met kruie in

Ø  3 skywe Fetakaas wat baie fyn gedruk is

Ø  ½ Koppie gerasperde Cheddarkaas

Ø  Vars Pietersielie en Basieliekruid – Fyn gekap

Ø  2 Eetlepels botter of bakmargarien

Ø  1 Eetlepel Meelblom

Ø  Rooipeper na smaak.

Ø  1 Teelepel Paprika

Ø  Knippie sout 

Meng nou alles deeglik met ‘n vurk en skep in die sampioene in. 

Bak in die oond met net die onderste rooster aan teen 100ºC tot mengsel gesmelt het of braai op matige kole op foelie. Heerlike bygereg vir omtrent enige maal.

Geniet !!!

26/02/10/ 

SLAAISOUSE. 

SLAAISOUS VIR GROENSLAAI. 

Meng die volgende saam.

Ø  150ml Bulgaarse joghurt

Ø  ½ Teelepel Fyn Knoffel

Ø  ½ Teelepel Aangemaakte Mosterd

Ø  3 Eetlepels gerasperde Ui

Ø  Handvol gekapte Pietersielie

Ø  4 Fyngekapte Agurtjies

Ø  3 Eetlepels van die agukies se sous. 

Plaas bogenoemde bestandele in ‘n voedselverwerker en maak fyn. 

BOBAAS SLAAISOUS 

Skud die volgende bestandele saam.

Ø  1½ Teelepels Vissmeer

Ø  3 Knoffelhuisies – baie fyn gekap

Ø  ½ Koppie Balsiemiese Asyn

Ø  3 Teelepels Suurlemoensap

Ø  2 Eiergele

Ø  ½ Teelepel Suiker – na smaak

Ø  2 Teelepels aangemaakte Mosterd

Ø  1 ½ Koppies Olie

Ø  3 Skutte Worcestershiresous

Ø  Vars Gemaalde Swarpeper. 

Die sous hou goed in die yskas.  

Geniet !!!

26/02/10/

VISTERT. 

Dankie aan Lynette Puren wat vir ons die resep ui Texas, VSA gestuur het. 

Sit een rol Blaardeeg (“Puff Pastry”) onder in ‘n gesmeerde oondbak. Prik goed met ‘n vurk. 

Meng 2 Groot blikke Kerrievis met 2 of 3 geklitste eiers en ½ koppie melk.

Gooi in die kors in.

Maak ‘n lekker stywe witsous waarby daar 1 koppie gerasperde Cheddarkaas geroer is en smeer oor die visvulsel.

Bak by 200ºC tot eiers gestol is en die kors lekker goudbruin is. 

Geniet !!!

26/02/10/ 

KNOFFELBROOD MET ROOM. 

Dankie aan Nicola Schoeman vir die resep. Hierdie is een van daardie resepte wat jy op en met gevoel maak. Die bestandele en hoeveelhede gaan oor hoe jy voel, waarvoor jy lus is en wat jy in die kas het. 

Koop Brooddeeg by die winkel. 

Maak die deeg in ‘n lang vorm soos ‘n brood. Die brood moet nie langer as jou oondskottel wees nie. Sny die deeg in die middel oop – op die lengte af.

*Plaas jou vulsel in die gleuf.

Druk die deeg gleuf weer toe.

Plaas die deeg met die genyde kant onder in ‘n gesmeerde oondpan. Gebruik die diepste oondpan wat jy het.

Meng een pakkie ‘Potato Bake’(opsioneel) met 375ml Room (1 ½ bekertjies) en gooi oor die deeg.

Bak vir 1 uur @180ºC

Gooi die laaste bietjie room oor 5 minute voor die brood uit die oond uit kom. 

*Die vulsel:

Nicola se resep se die volgende:

Kaas – Soveel jy wil.

Gebraaide ontbytspek (opsioneel)

Gekapte Olywe (opsioneel)

Knoffel – so veel as wat jy wil insit. 

Maar………. Hoekom nie Pikante rissies, genipperde spinasie en Fetakaas, pynappelstukke of biltong nie. Gebruik jou verbeelding en kyk wat in die kas is. 

Geniet !!!

05/01/10 

SJOKOLADEROOMPASTEI.

Dankie aan Santie Olivier vir die resep. 

Maak ‘n beskuitjiekors deur 1 pakkie Romany Creams te krummel en met 85g gesmelte Botter of Bakmargarien te meng. Voer ‘n tertbak daarmee uit en plaas in yskas om te stol. 

Smelt 150g Marsmallows in 1 koppie melk in ‘n potjie op die stoof.

Breek 1 x 200g plak Melksjokolade in blokkies en roer by die melk tot gesmelt.

Laat afkoel.

Klop 250 ml Room styf en vou in die sjokolade in en skep in jou kors in. 

Plaas in yskas om te stol. 

Maak sjokoladekrulle deur ‘n blok sjokolade met ‘n groenteskiller te kerf.

Garneer met die krulle. 

Geniet !!!

RL 03/04/08

SJOKOLADE KAASKOEK. 

Maak ‘n beskuitjiekors van 200g Romany Creams  wat gekrummel is en 125g Gesmelte Botter en druk ‘n groot Tertbord daarmee uit. 

·         Meng 1½ Bakkies (375g) Roomkaas met 75g Strooisuiker en klits tot romerig.

·         Smelt 100g (1 blok) Bournville Sjokolade in 125ml Melk en laat effens afkoel.

·         Voeg die Sjokolademengsel by die Roomkaasmengsel.

·         Voeg ½ Teelepel Lemoen-of Rum- of Vanieljegeursel by

·         Smelt 20ml Gelatien (2 Pakkies) in bietjie kookwater en roer by mengsel.

·         Klits 250ml Room styf en meng halfte van die room in die mengsel in.

Plaas in yskas en laat stol. 

Smeer die ander halfte van die room bo-op en rasper 50g Top Deck  bo-oor.         

Geniet !!!

05/01/10

JOGURTTERT. 

Maak ‘n beskuitjiekors deur ‘n pakkie Tennisbeskuitjies fyn te maak en met 85g gesmelte Botter of Bakmargarien te meng. Voer ‘n tertbak daarmee uit. Plaas in yskas om af te koel. 

Klits die volgende bestandele baie goed saam en skep in die kors

1 Liter gewone Joghurt

1 pakkie Sjokolade of Vanilje Kitspoeding

1 koppie (250 ml) Room

1 Blikkie (395g) Kondensmelk 

Plaas in die yskas om te stol. 

Net voor opdiening krummel ‘n Flake bo-oor 

Geniet !!!

29/01/10

FRIKKADELLE IN ‘N BRANDEWYNSOUS. 

Maak die frikkadelle deur: 

1 kg maalvleis, ¾ koppie sagte broodkrummels, 2 eetlepels Worcestershiresous, 1 teelepel knoffelsout en ‘n ¼ teelepel neutmuskaat, ¼ teelepel gemaalde gemmer en  3 skudde warm rissiesous saam te meng.  

Maak kleinerige frikkadelle en braai in ‘n groot braaipan tot bruin.  Dreineer en sit eenkant.   Vee die braaipan uit met kombuispapier. 

Maak nou die sous deur:

‘n Klein blikkie (410g) fyn appelkooskonfyt, ¼  koppie brunisuiker, ½ koppie brandewyn en  ½ teelepel neutmuskaat in die braaipan te laat prut vir 10 minute. 

Voeg die frikkadelle by en prut vir 1 uur terwyl die frikkadelle gedurig geroer word.  Voeg een teelepel mielieblom wat in ‘n bietjie water gemeng is by, en prut tot sous dik is.

Geniet !!!

29/01/10

PAMPOENBURGERS. 

Braai 750gm maer maalvleis en ‘n medium gekapte ui tot vleis grys en los is. Voeg 1 blikkie Chakalaka en 1 blikkie Room van Tamatiesop, ‘n halwe koppie fyngemaakte Pampoen, ‘n knippie fyn Gemengde Speserye sout en peper na smaak by.  Prut met die deksel op vir 10 minute.  Prut dan verder met die deksel af vir nog 20 minute totdat die mengsel dik is.  Indien nodig, voeg koekmeel bietjies bietjies by om mengsel dikker te maak. Die mengsel moet sag, maar nie loperig wees nie.  Bedien op ‘n hamburger rolletjie met slaaiblare.

Geniet !!!

29/01/10

KERRIE-en PIESANGFRIKKADELLE. 

Week 3 Snye Witbrood in 125ml Karringmelk.

Meng nou die brood met 1kg Maer Maalvleis, 1 Geraperde Ui, 1 Eier, 2 Eetlepels Blatjang, 2 Eetlepels Tamatiesous, 2 Teelepels Worcestershiresous, 1 Teelepel Kerriepoeier, Knippie neutmuskaat, Knippie Gemaalde Naeltjies, Sout en peper.

Vorm frikkaddele en rol hulle in bietjie meel.

Pak die frikkadelle in ‘n oondskottel met ‘n deksel. 

Voorverhit die oond tot 190ºC. 

Maak nou die sous:

Sny 4 lekker groot uie fyn en braai in olie tot sag en deurskynend.

Meng nou 25ml Koekmeelblom, 125ml Asyn, 15ml Suurlemoensap,750ml Water, 12,5ml Blatjang, 10 ml Suiker by die uie. Kerf nou 2 Piesangs fyn en voeg by die sousbestandele. Laat prut nou ‘n paar minute tot die piesangs sag is.

Sny nou 4 Piesangs in skywe en versprei eweredig oor die Frikkadelle.

Gooi die sous oor die Frikkadelle en bak so 1 uur tot gaar. Gaarmaak tyd hang van die grote van die Frikkadelle af. 

Geniet !!!

29/01/09

GEVULDE FRIKKADELLE.

Week 3 Snye Witbrood in 125ml Karringmelk.

Meng nou die brood met 1kg Maer Maalvleis, 1 Geraperde Ui, 1 Eier, 2 Eetlepels Blatjang, 2 Eetlepels Tamaties, 2 Teelepels Worcestershiresous, 1 Teelepel Kerriepoeier, Knippie neutmuskaat, Knippie Gemaalde Naeltjies, Sout en peper.

Maak nou die vulsel:

Braai 1 Ui, ¼ Soetrissie, 125g Ontbytspek, Bietjie Knoffel, 285g blikkie gesnyde Sampioene saam.

Gooi 66ml Karingmelk en 25ml Romerige Kruieslaaisous by en laat prut so paar minute. Laat afkoel. 

Voorverhit die oond tot 180ºC. 

Verdeel nou die sous en maalvleismengsel in 6 eweredige porsies.

Neem halfte van een maalvleisporsie en vorm  ‘n bakkie met die vleis. Jy kan of jou hand of ‘n bakkie gebruik. Onthou net om jou vorm goed met meel te smeer. Pak nou in die onderste halfte van die bakkie ‘n laag gerasperde Cheddarkaas. Skep nou een porsie vulsel bo-op en bedek dit met kaas. Plaas die ander halfte van die vleismengsel bo-op en seel die kante dig. Rol die balletjie in meel en plaas in ‘n gesmeerde oondskottel met ‘n deksel. Vul nou al die ander frikkadelle en bak met die deksel op vir so 1 uur tot gaar, 

Bedien met kapokaartappels.  

Geniet !!!

29/01/10 

FRIKKADELLE IN ‘N ROOMSOUS. 

Maak die frikkadelle deur: 

750g maalvleis,  1 geklitste eier, ¼ koppie melk, 2 eetlepels tamatiesous, 2 eetlepels Worcestershiresous, ¾ koppie kitshawermout, ‘n klein gekapte uitjie,

1 teelepel gedroogde pietersielie, sout en peper na smaak te meng. 

Maak kleinerige frikkadelle, rol in koekmeel en plaas in ‘n gesmeerde oondpan en bak vir 10 minute teen 200ºC. Draai en bak nog 12 tot 15 minute tot gaar. Dreineer op kombuispapier en hou warm. 

Maak nou die sous: 

Smelt in ‘n braaipan 2 eetlepels botter en voeg twee eetlepels koekmeel, ¼ eetlepel gedroogde tiemie, rooipeper en sout by na smaak. Roer tot glad.  Voeg geleidelik 1½ koppies hoenderekstrak en 1 koppie room by en prut terwyl dit gedurig geroer word tot dikkerig. 

Skep frikkadelle in ‘n opdienbak en gooi die sous bo-oor,

Geniet !!!