N4 brug tuimel inmekaar naby Nelspruit

Roelf Van Jaarsveld 01 Oktober

Die N4 tolpad wes van Nelspuit is vanoggend vir verkeer oopgestel nadat balke van 'n nuwe brug wat onder konstruksie is, laat gisteraand inmekaar getuimel en alle bane versper het. Die brug is deel van die ringpad wat by die nuutgeboude 2010 Mbombela stadion begin. Ingenieurs  vermoed dat die balke van die brug weens vibrasies van verbygaande swaar vragmotors meegegee het.

Standerton inwoners in hegtenis na geweld optog

Gewelddadige betogings het weer  vanoggend in die Sakhile woonbuurt buite Standerton uitgebreek. Ontstoke inwoners wat oor swak munisipale dienslewering en korrupte amptenare kla, het die R-23 pad tussen Johannesburg en Standerton weer met klippe en brandende buitebande versper. Altesame 24 inwoners is gister weens openbare geweld in hegtenis geneem.

21 Jarige Nelspruiter pleeg selfmoord

Roelf Van Jaarsveld 28 September

 ‘n Jong Nelspruiter het Saterdagaand sy eie lewe geneem, pas na sy mondigswordingspartytjie. Die 21-jarige Anthony Pike, ‘n werknemer by Union Motors, was vanoggend as vermis aangegee. Na ‘n soektog is sy lyk later gevind waar hy homself met ‘n plastiek verpakkingskoord opgehang het. Geen nota is by sy lyk gevind nie en die redes wat kon lei tot sy selfmoord is onbekend. Anthony se ouers is albei reeds oorlede en hy was die enigste kind.

 Geweld weer in Standerton

Die polisie in Standerton sê geweld het weer in die Sakhile-woongebied uitgebreek en die polisie moes rubberkoeëls gebruik om te keer dat inwoners die R23- en Robertsdrift-paaie versper. Gistermiddag is minstens ses mense gewond toe die polisie ook rubberkoeëls gebruik het om betogers uiteen te jaag. Sowat 60-duisend rand se skade is aangerig toe Standerton se munisipale kantore Saterdag aan die brand gesteek is en gister is petrolbomme ook na die huis van ‘n munisipale amptenaar gegooi.

Korrupte polisie beamptes uitgewys

Roelf Van Jaarsveld 22 September

‘n Gewapende rower, Wisser Mahlangu, wat saam met ‘n vorige polisiekonstabel, Phillip Makwela, op 24 April vanjaar ‘n groot rooftog in Lydenburg uitgevoer het, het op 1 Junie borgtog van R10,000 betaal om weer in die hof op 6 Julie te verskyn. Mahlangu is serdertdien ‘n voortvlugtige nadat hy nie sy borgvoorwaardes nagekom het nie.  

En nog twee polisiemanne, Sers. Mandla Sithole en Sers. Bheki Maphanga,  is op aanklagte van diefstal en korrupsie gearresteer.  Die twee het ‘n verdagte  - wat in besit van onwettige sigarette op Komatipoort betrap is - belowe dat hulle sal toesien dat die saak uitgegooi word, in ruil vir R10,000. Die smokkelaar het egter net R5000 oorhandig. Die twee polsiemanne het die geld en die sigarette, ter waarde van R69,000 vir hulle self gehou. Die saak is uitgestel tot 4 November nadat beide R1000 borg betaal het.

Sekuriteitswag dood na klippe en stokke

Roelf Van Jaarsveld 21 September

'n Sekuriteitswag is deur inwoners van die Simile-woongebied by Sabie met klippe en stokke doodgemaak. Dit het gebeur nadat die wag glo 'n betoger omgery het. Woedende inwoners, wat met ‘n protesoptog besig was, het hom uit sy voertuig gepluk en aangerand.

Universiteit in Mpumalanga?

Roelf Van Jaarsveld 18 September

Die Parlement ondersoek die moontlikheid om universiteite in die Noord-Kaap en Mpumalanga te stig. Die voorsitter van die parlementêre portefeuljekomitee oor Hoër Onderwys en Opleiding, Marius Fransman, sê die komitee gaan die provinsiale onderwys-departemente en ander rolspelers betrek om die vaardigheidsbehoeftes te bepaal en te kyk hoe ‘n universiteit op die beste manier by die provinsies ingefaseer kan word. Hy sê Suid-Afrika het 23 universiteite, maar met die nuwe bedeling en nuwe provinsiale grense, het Mpumalanga en die Noord-Kaap steeds nie hulle eie universiteite nie.

Laerskool Laeveld bekende oorlede

Roelf Van Jaarsveld 16 September

Laerskool Laeveld is in rou gedompel na die skielike afsterwe van mev. Ebenha Ebersöhn wat vir bykans 17 jaar hier diens gedoen het. Sedert 1999 was sy in die pos van Departementshoof Grondslagfase. Haar skielike afsterwe op 56 laat ‘n groot leemte in Laerskool Laeveld se hart. Dis nog onseker wat tot haar dood gelei het. Sy laat haar man Frans en enigste dogter Hesca na. Haar roudiens vind Saterdag 19 September om 11:00 vanuit die NG-Westergloed Gemeente plaas.

Rooftog in Graskop

Roelf Van Jaarsveld 15 September

’n Sekuriteitswag is in die bene geskiet toe sowat 20 gewapende rowers ‘n geldwa by ‘n vulstasie op Graskop geteiken het. Die twee wagte is oorval toe hulle geld by die vulstasie afgehaal het. Die rowers het na die skietery met die geldwa weggejaag  en die voertuig se agterruit later met plofstof uitgeskiet en met die geld in vier verskillende motors weggejaag. Twee van die voertuie  is later by Hazyview deur die polisie gevind.

Beamptes by lisensie bedrog betrek

Die provinisale woordvoerder van die SAPD in Mpumalanga, Kapt. Leonard Hlathi, rapporteer dat ‘n lisensie-beampte en sy vermoedelike meelopers in Kwamhlanga vasgetrek is. Onder die meelopers is eienaars van bestuurskole en hulle agente wat blykbaar valse leerlingtoetse namens hulle kliënte aflê. In nog ‘n geval is ‘n polisiekonstabel in Belfast gearresteer wat werkloses R3000 vra om aansoek te doen vir werk in die polisiediens. Die polisie het weereens gewaarsku dat geen werkgewer geld vra vir werkaansoekers nie en dat soortgelyke gevalle by die naaste polisiekantoor gerapporteer moet word.

Polisiebeampte dalk deel van gewapende roof

Roelf Van Jaarsveld 14 September

'n Polisiebeampte van Nelspruit en nog drie verdagtes sal na verwagting vandag in die hof verskyn op aanklagte van gewapende roof. Hulle is die naweek by Matsulu in hegtenis geneem toe die polisie 18 gesteelde selfone en 'n groot bedrag geld in hulle motor ontdek het

16 Dwelmverdagtes in Secunda vasgetrek

Woordvoerder vir die Mpumalanga Polisiediens, Kapt. Leonard Hlathi, berig dat die Georganiseerde Misdaadeenheid op Secunda sedert 10 September sestien verdagtes vasgetrek het wat vermoedelik deel is van ‘n sindikaat wat handel dryf in dwelms.  Die verdagtes is 3 Suid-Afrikaners, 12 Nigerieërs en 1 Kongolees. Die totale waarde van die dwelms beloop sowat R214,000. Die dwelms, sowel as drie voertuie wat deur die sindikaat gebruik is, was ook gekonfiskeer. Kapt. Hlathi het ‘n beroep op die publiek gedoen om die gebruik van dwelms te stop. Hy het ook ‘n ernstige waarskuwing aan dwelmhandelaars gerig dat die polisie nie sal rus alvorens elkeen veilig agter tralies sit nie

Aptelike verslag dalk vervals

Roelf Van Jaarsveld 11 September

Die handtekening van die ouditeur-generaal in Mpumalanga is moontlik deur ’n staatsamptenaar vervals in ’n oënskynlike poging om die skokkende toestand van die provinsie se departement van gesondheid se geldsake te verdoesel. Beeld berig dat dit gister tydens ’n sitting van die staande komitee oor openbare rekeninge (Skoor) in die Mpumalanga-wetgewer aan die lig gekom het. Daar is ook ontdek dat daar op talle plekke met die syfers in die geldstate van die departement gekonkel is. Die voorsitter van Skoor, Fish Mahlalela, sê dié komitee gaan regsadvies inwin oor hoe die aangeleentheid hanteer moet word.

Dienslewering aangespreek

Roelf Van Jaarsveld 10 September

Die ANC het uiteindelik gereageer op klagtes van geldelike wanbestuur en swak dienslewering teen tien raadslede van die Thaba Chweu-munisipaliteit in Lydenburg. Nadat die dorp en die naburige woonbuurt, Mashishing, die afgelope vyf maande gedurig onder grootskaalse onluste en betogings deurgeloop het, is die burgemeester, Rdl. Clara Ndlovu uit haar amp en as raadslid uitgeskop. Nege ander lede is ook afgedank. DA-raadslid in die munisipaliteit, Me. Sonja Boshoff, verwelkom die besluit van die ANC en het gesê dat almal van hulle bygedra het tot die gemors waarin die dorp en die raad is.

 Aanval op Kaapschehoopweg

‘n Onbekende manspersoon wat alleen op die Hermansburgpad tussen die Kaapse Hoop-pad en die Barbertonpad bly, is na bewering laasnag deur twee rowers oorval. Hulle is met sy Rooi Ford Telstar daar weg en nadat die polisie en ‘n sekuriteitsmaatksappy deur die buurman verwittig is, het hulle op die boewe afgekom wat van die toneel probeer vlug het. In hulle haas om weg te kom is die motor in ‘n sloot in, waarna die boosdoeners weggehardloop het. By nadere ondersoek is daar by die plaashuis ‘n graaf met bloed daaraan asook ‘n bril gevind. Die inbrekers en die eienaar is skoonveld. Die polisie ondersoek die saak.

 Verdagtes dood na jaagtog ongeluk

Drie vermeende misdadigers is naby Nelspruit dood toe hulle vir ’n verkeersman weggejaag en die bestuurder beheer oor die motor verloor en teen ‘n boom gebots het. Twee van hulle was verdagtes wat al lank deur die polisie in Mpumalanga gesoek is vir hulle beweerde betrokkenheid by OTM-bomme. Volgens die polisie se kaptein Erhard Ströh is twee nege millimeter pistole waarvan die reeksnommers afgevyl was, asook klapmusse en handskoene ná die ongeluk in die voertuig gekry. Nog drie insittendes is met ernstige beserings en onder polisiebewaking in die Thema-hospitaal buite Witrivier.

 Swendelaars slaan op Laeveld toe

Roelf Van Jaarsveld 09 September

Twee mans wat valslik voorgegee het dat hulle teen betaling van drieduisend rand werk vir mense in die polisiediens en die munisipaliteit in Nelspruit  kan kry is, is in hegtenis geneem. SAPD vorms en aansoekvorms om werk van die Mbombela munisipaliteit is in die verdagtes se besit gevind. Die twee mans, wat hulle as polisiebeamptes voorgedoen het, is in hegtenis geneem nadat die polisie ‘n lokval vir hulle gestel het. 

In ‘n soortgelyke voorval, ook in Nelspruit het die polisie 32 klagtes ontvang van mense wat teen betaling van  200 rand werkgeleenthede in die weermag beloof word. Die desperate werksoekers het gereageer op pamflette  wat deur die bedrieërs opgestel en in die dorp uitgedeel is.Die aansoekers wat hul geld betaal het, is aangesê om vir ‘n bus buite ‘n hotel in Nelspruit te wag wat nooit opgedaag het nie. 

 Die SAPD het verskeie klagtes van die publiek ontvang van bedrieërs wat kwansuis poste adverteer. In al die gevalle word kontantgeld gewoonlik saam met die vervalsde aansoekvorms gevra. Aaansoekers moet ook afskrifte van hulle ID’s, getuigskrifte van skole dat gr. 10, 11 en 12 wel voltooi is oorhandig. Een groep bedrieërs het aangedui dat hulle aansoeke inwag vir belangstellendes om by die SA Weermag aan te sluit met beloftes van gratis opleiding en salarisse van R9600 per maand. ‘n Woordvoer van die SAPD in Nelspruit, Kapt Leonard Hlathi, het die publiek daarop gewys dat niemand geld hoef te betaal as jy vir werk aansoek doen nie. Soortgelyke gevalle moet onmiddellik by Insp. Edward Swanepoel by 082 960 4891 aangemeld word.

Helikopter Ontplof in Witrivier

Roelf Van Jaarsveld 08 September

’n Grondeienaar het vandag in die Nelspruit streekhof verskyn op aanklagte van die oortreding van Wet 101 van 1998 op Nasionale Veld en Bosbrande. Die persoon is daarvan aangekla dat hy in Augustus 2008 veldbrande veroorsaak het sonder die nodige permit en in die tweede geval dat veldbrande sonder toesig gelaat is. Die eienaar is vir elke oortreding ‘n boete van R1500 opgelê. Regter D.D. Ngobeni het ook in sy uitspraak gesê dat die boete van R1500 hersien moet word, omdat dit, volgens hom te min is.

Lente is aangekondig

Laerskool Laeveld se graad R Lollies het behoorlik die koms van die Lente gevier deur elk met ‘n prag “Lente-hoed” hul opwagting by die skool te maak. Kreatiwiteit was aan die orde van die dag en hoede het gewissel van ‘n balon-blommehoed tot ‘n regte seemanshoed versier met sand en skulpe. 

Agter links na regs: Zelika van Wyk, Amanda van der Merwe, Sphelele Mashele en Jacques van Aardt

Voor links na regs: Ashaan Sebastian, Tiané Bezuidenhout, Alexander Boswell, Le Roux Fourie, Hainroux Erasmus en Aimee Bladwell

 Voor links na regs: Suretha Smit, Chané Visser, Chiné Maritz, Saartjie Breytenbach en Janco van Zweel. Agter links na regs: Francois Coetzee en Christo de Villiers

6 Renosterstropers in hegtenis geneem

Roelf Van Jaarsveld 03 September

’n Mosambiekse muil is in Swaziland in hegtenis geneem nadat meer as 70 pakkies kokaïen in sy maag ontdek is. Sy landgenoot is ook deur die land se polisie gearresteer. Die dwelms, wat vermoedelik van Pakistan afkomstig is, was vir Suid-Afrika bestem.

6 Renosterstropers in hegtenis geneem

Roelf Van Jaarsveld 02 September

Nog ses verdagtes is in die Kruger-wildtuin op aanklagte van renosterstropery in hegtenis geneem. SanParke se uitvoerende hoof, David Mabunda, sê sedert einde Julie het hulle nog sewe witrenosters verloor wat die totaal vanjaar op 33 te staan bring. Hy sê al 14 verdagtes wat reeds in hegtenis geneem is, was van Mosambiek. In die jongste geval is beslag ook gelê op vyf onwettige vuurwapens. Mabunda sê SanParke gaan meer as vyf-miljoen rand van die Park-ontwikkelingsfonds gebruik om optrede teen stropery in die Kruger-wildtuin te verbeter.

Redeneer, dié kan Laerskool laeveld!

Links na regs is Carmen van der Merwe, Kyla van Eijk en Rourke Scott 

Laerskool Laeveld se Gr. 4 en 5 leerders het onlangs hul interne graadredenaarskompetisie gehad.  Sprekers het hul puik  van hul taak gekwyt met soveel selfvertroue, pragtige humor en kreatiewe taalgebruik.

Interessante onderwerpe was aan die orde van die dag. Die eerste drie wenners in graad 4 is Carmen van der Merwe (Vergeet van ‘n diet), Kyla van Eijk (Die wêreld om my is ongeskik), Rourke Scott (Sport moenie die plek van speel vat nie).

Cari Venter, Laura Vorster en Simoné Lauwrens   

Die wenners van graad 5 is Cari Venter (Trek kultuur), Laura Vorster (Die kweek van geldslim kinders) Simoné Lauwrens (Blondines lewer uitstekende diens).  

Mandrax tablette in Malelane gevind

Roelf Van Jaarsveld 01 September

Twee persone wat Sondag by die Lebombo-grenspos weens R2,6m se Mandrax tablette aangekeer is, het vandag in die Magistraatskantoor van Malelane verskyn. Cyril Mzwakali en sy vrou Olga het onskuldig gepleit en aangevoer dat hulle die voertuig namens iemand anders moes aflewer en nie bewus was van die ongeveer 55 sakke Mandrax wat in die motor versteek was nie.