‘n Dringende vergadering op Maandag vir die Barberton belastingbetalers.

29 Mei 2009 - Naranda Leeuwner

Die Umjindi belastingbetalersvereniging het ‘n dringende vergadering op Maandag, 1 Junie, om ses uur die aand gereël om dringende kwessies te bespreek. Volgens die sekretaris van die belastingbetalersvereniging, Andry Nuns, is daar ernstige foute in die eiendomswaardasie register. Die Umijindi Munisipaliteit weier om dié foute te herstel voor die voorstelling van die nuwe eiendomstariewe op 1 Julie nie bekend gemaak is nie. Dit beteken hoër belastingstariewe wat in plek gehou gaan word totdat waardasie uiteindelik reggestel word. Volgens hom is verskeie eiendomme onderskat. Belastingbetalers gaan onkant betrap word as die beplande aanvullende waardasie vroeg in die nuwe jaar plaasvind en verhoging word toegepas op die hoë belastingtariewe wat in Julie die jaar bepaal is. Die vergadering gaan ook die kwessie aanraak waar die munisipaliteitsbegroting deurgeforseer word, ten spyte van verskille op die eiendomstariewe en te min insette van die publiek.

Man pleeg selfmoord na rusie en moord op vriendin.

28 Mei 2009 - Naranda Leeuwner

‘n Man van Nelspruit het gisteraand omstreeks kwart voor agt selfmoord gepleeg nadat hy sy vriendin geskiet het. Die man, wie se naam nog nie genoem kan word nie omdat sy naasbestaandes nog nie in kennis gestel is nie, was in ‘n rusie met sy vriendin. Sy het gesien dat hy ‘n geweer by hom het en wou haar tannie, wie by hulle woon, gaan waarsku. Hy het haar in die rug geskiet toe sy weghardloop. Sy is op die toneel dood.  Hy het kort daarna die geweer op homself gedraai en selfmoord gepleeg. Volgens die provinsiale kommunikasiebeampte, Dimpho Nkosi, het 'n ooggetuie dadelik die polisie in kennis gestel. ‘n Saak van moord is geopen.

Vrou beroof van R35 000 kontant ontrekking.

‘n Vrou van Nelspruit is gisteroggend van R35 000 beroof oppad na die bank in Besterstraat. Volgens die provinsiale polisie kommunikasiebeampte, Dhimpo Nkosi, het Nombeko Fakude met ‘n swartsak vol geld na die bank gestap toe ‘n man haar van agter aangeval het en met ‘n mes gedreig het. Hy het die sak met geld in by haar gevat en van die toneel weggehardloop. Die polisie waarsku dat persone nie met geld in die straat moet bank toe stap nie. Sy sê die risiko is te hoog dat kansvatters tot so ver sal gaan as om jou lewe te neem om kontant te steel. Volgens haar moet mens eerder van sekuriteitsmaatskappye gebruik maak om groot somme geld te bank.  Niemand is in die voorval beseer nie en die verdagte word steeds gesoek.

Impala Slaghuis in Nelspruit loop deur in ‘n gewapende roof.

Die 63-jarige Manuel Pestana en twee personeellede is gisteraand omstreeks tien-minute oor sewe by die Impala Slaghuis in Nelspruit deur vier verdagtes oorval. Twee van hulle was gewapen met rewolwers en een verdagte het ‘n slagtersmes by hom gehad. Die verdagtes het vir Manuel in ‘n agterste kantoor inforseer en hom gedwing om die kluis oop te sluit. Impala Slaghuis is van dertig-duisend-rand beroof. Hulle het vir Manuel in die kantoor toegesluit en van die toneel gevlug. Niemand is in die voorval beseer nie en die verdagtes is steeds op vrye voet. Die plaaslike polisie ondersoek ‘n saak van gewapende roof.  

Voertuigroof in Lydenburg

‘n Man, Finias Morobi, is gisteraand omstreeks tien-uur op sy plaas in Doornhoek, net buite Lydenburg, aangeval. Die verdagte het ‘n rewolwer ter waarde van twee-duisend-rand gesteel en met Finias se Datsun bakkie ter waarde van dertig-duisend-rand, met nommerplaat BZW 236 MP weggejaag. Die bakkie is steeds op soek en niemand is tot dusver gearresteer nie. Vir enige inligting indien jy die bakkie gewaar, bel die polisie by: 013 759 1370.

Gevaarlike Nelspruit misdadiger ontsnap in transito.

27 Mei 2009 - Naranda Leeuwner

Een van die twee verdagtes wat op 8 Desember 2005 gearresteer is vir die Emnotweni Casino gewapende roof in Nelspruit, het ontsnap toe hy na die Pretoria se gevangenis vervoer is. Thami Ndengezi het daarin geslaag om op die hoek van Skinner en Schubart strate in Pretoria te ontsnap nadat hy Maandag in die hof in Nelspruit verskyn het. Thami het uit die bewegende voertuig gespring nadat hy sy regterhand uit die boeie losgewikkel het.  Volgens die woordvoerder van georganiseerde misdaad in Mpumalanga, kapt. Leonard Hlathi, het Thami en sy makkers in 2005 daarin geslaag om die Emnotweni Casino van meer as een-miljoen rand  te beroof en was ook in ‘n gewapende roof by die Modimelle’s Eerste Nasionale Bank in Limpopo betrokke waar hulle R70 000 geroof het. Thami was ook betrokke in vyf kapings in Johannesburg en die polisie het ‘n AK 47 en verskeie nege millimeter pistole in hulle besit gekry. Hy moes egter nog vanaf 19 tot 30 Oktober in die hof op aanklag van die gewapende bankroof verskyn het. Enige iemand met inligting kan insp  Hendrik Kruger by 014 718 7528 skakel, of Willem Nel by 072 152 5951. 

Eiendomsbelasting moontlik onwettig verhoog

Die Mbombela Belastingsbetalersvereniging is bekommerd oor die Mbombela Munisipaliteit wat eiendomsbelasting met tot 85 persent verhoog, en nie die regte prosedure volg om die jaar se begroting goedgekeur te kry nie. Soos in Beeld berig, wil dit voorkom of die stadsraad die wet op Munisipale Finansiële Bestuur vir ‘n tweede keer in vier weke gaan oortree omdat die raad klaarblyklik steeds nie sy nuwe begroting goedgekeur het vir 2009/2010 nie. Die finale begroting moet voor die einde van dié maand goedgekeur word en die publiek het nie genoeg kans gehad om insette te lewer nie. Uitstel is tot 5 Junie gekry. Die LUR vir finansies, Pinky Phosa, moes klaarblyklik ingryp omdat die raad die begroting wil goedkeur voordat die spertyd verby is nie. Ons skakel oor na Adrie Smith van der Merwe, wat die voorsitter van die Mbombela belastingsbetalersvereniging is.

 >>>>>>>

Komatipoort dwelmsmokkel saak uitgestel

26 Mei 2009 - Naranda Leeuwner

Die saak teen die twee verdagtes wat betrokke is in die twee-en-vyftig miljoen rand se dwelmsmokkelary by die Lebombo grenspos buite Komatipoort verlede Vrydag, se saak is uitgestel tot 2 Junie. Die woordvoerder van georganiseerde misdaad, Kapt, Leonard Hlati, het in ‘n verklaring gesê Jaime Maluzane Chauke en Manuel Mamuse het vandag in die Komatiepoort se rondgaande hof verskyn. Beide die verdagtes is Vrydag gearresteer nadat die polisie ‘n ondersoek op hulle swaar voertuig ingestel het waar hulle op ‘n vals kompartement binne die trok afgekom het. ‘n Totaal van honderd-drie-en-tagtig kilogram heroïn is in die trok gevind wat onderweg was Gauteng.

Twee families in Curlews is gisteraand by dieselfde huis aangeval.

Twee families en ‘n vier-maande oue baba is gisteraand omstreeks sewe-uur by hul huis in Curlews, agt kilometer buite Witrivier, deur drie gewapende rowers oorval. Volgens die hoof van die speurtak in Witrivier, kapt. Erhard Ströh, het die drie verdagtes elk handwapens gehad en die slagoffers in die huis vasgebind. Peter Dinneto en sy vrou, asook hul vier maande oue baba, is saam met Peter se swaer, Derek Bouwer en dié se vrou, deur die rowers aangehou, maar hulle het ongedeerd van die voorval afgekom. Ströh sê die verdagtes het ‘n Land Rover asook kontant en onder meer ‘n skootrekenaar gesteel. Die voertuig is gisteraand egter deur die plaaslike polisie en Netstar teruggevind. Die items en kontant wat gesteel is, het ‘n beraamde waarde van ongeveer honderd duisend rand. Niemand is in hegtenis geneem nie.

Bergvlam 0/16 dogters na Netbalproewe

Een man is gister dood toe ‘n swaar voertuig gerol het.

25 Mei 2009 - Naranda Leeuwner

‘n Saak van strafbare manslag is gister omstreeks half-vier geopen toe ‘n swaar voertuig met nege passasiers agterop, gerol het. Volgens die provinsiale polisiewoordvoerder, supt. Aby Khoabane, het die ongeluk tussen Lydenburg en Sabie plaasgevind. Dit wil voorkom of die trok-bestuurder beheer oor die voertuig verloor het om een van die draaie. Een van die nege passasiers is op die toneel dood. Sy naam mag egter nog nie bekend gemaak word nie omdat sy naasbestaandes nog nie in kennis gestel is nie. Daar was geen ander voertuie in die ongeluk betrokke nie.

Stoorkamer brandskade in Rocky Drift

‘n Brand het gisteraand omstreeks tien minute oor agt by die Kleendeel plaas se stoorkamer in Rocky’s Drift tussen Witrivier en Nelspuit uitgebreek. Volgens die provinsiale polisiewoordvoerder,  Supt Aby Khoabane, is hulle nog besig met ‘n ondersoek oor hoe die vuur uigebreek het. Niemand is egter in die voorval beseer nie, maar Khoabane sê die skade beloop teen ongeveer tien-duisend-rand vir die stoorkamer. Die moontlikheid dat iemand die vuur gestig het, word ondersoek.

Supermarkroof verdagtes gevang

21 Mei 2009 - Naranda Leeuwner

Een van die twee verdagtes  wat op ‘n supermark in Kwaggafontein toegesak het, is gistermiddag gearresteer en verskyn vandag in die hof op aanklag van besigheidsroof, aanranding en beskading van eiendom. Die tweede verdagte is steeds opsoek nadat hulle vir Jashi Udin en sy vriend Sana Ullah aangeval het toe hulle die supermark ses-uur sluit. Jashi en Sana is in die winkel aangehou terwyl die verdagtes twaalf-duisend-rand se kruideniersware, twintig-duisend-rand kontant en selfone gesteel het. Hulle het ook skade aan die winkel aangerig wat ‘n verdere tien-duisend-rand beloop. Een van die verdagtes het blykbaar vergeet om die selfoon wat hulle afgeneem het, saam te neem en kon Jashi die polisie in kennis van die voorval stel wat tot die arrestasie gelei het.

Motorfietsryer dood in ongeluk

‘n Trokbestuurder is gister vir strafbare manslag gearresteer nadat hy met ‘n motorfietsbestuurder in ‘n ongeluk op Witbank in  Clewerstraat betrokke was. Volgens die provinsiale polisie kommunikasie beampte, Dimpho Nkosi, was die motorfietsbestuurder reeds dood toe die polisie en nooddienste, oomblikke nadat die ongeluk ongeveer half vier die middag plaasgevind het, op die toneel verskyn het. Sy het gesê die polisie is nog nie presies seker hoe die ongeluk plaasgevind het nie.  Die persoon op die motorfiets se naam mag nog nie bekend gemaak word nie omdat al sy familie nog nie in kennis gestel is nie. Die trokbestuurder verskyn vandag in die Witbank se hof.

Familie tuis helder oor dag beroof

‘n Witbankse familie het gisteraand omstreek half nege ‘n noue ontkoming gehad toe vier verdagtes by hulle hek ingestorm het toe hulle by die huis arriveer. Dimpho Nkosi, provinsiale polisie kommunikasie beampte, het gesê hul tuinwerker, Adam Tuma, het na die hek gehardloop om dit oop te maak toe die verdagtes hulle met wapens oorval. Hulle wou geld hê en het ook gedryg om hul sewe maande oue baba te skiet indien hulle nie samewerking gee nie. Die verdagtes het hulle in hul huis in Sonneblomstraat gedwing,  hulle vasgebind en in ‘n slaapkamer aangehou.  Verskeie klere, selfone skoene, juweliersware en hul silwer Audi Q 7 is in die voorval gesteel. Die items se waarde beloop ongeveer een-komma-twee-miljoen rand. Niemand is in die voorval beseer nie en die ondersoek duur nog voort om die verdagtes vas te trek.

"Verkeersbeamptes" kaap Delmas inwoner

20 Mei 2009 - Naranda Leeuwner

‘n Man van Delmas is gister van sy drie-honderd-duisend rand se silwer Toyota mini-bus gekaap. Thulani Mabila het met sy mini-bus, met nommerplaat: DPM 038 MP na Pretoria gery toe hy by ‘n aansluitingspad net buite Delmas gekaap is. Dit wil voorkom of twee verdagtes, wat hulle as verkeersbeamptes voorgedoen het, by die aansluitingspad gewag het. Hulle het Thulani van die pad afgetrek, hom vasgebind en agter in die minibus gegooi. ‘n Wit Mazda het hulle ingewag nadat die verdagtes terug in die rigting van Delmas gery het. Thulani is by ‘n mieliemeel plaas net buite Delmas afgelaai en die verdagtes het met sy voertuig gevlug. Volgens die provinsiale polisie kommunikasiebeamte, Dimpho Nkosi, is die polisie nie seker of die voorval met ander soortgelyke voorvalle, wat in die afgelope maand buite Middelburg plaasgevind het, verband hou nie. Radio Laeveld het in die maand ook berig gegee van ‘n trok, ‘n skoolbus en ‘n bakkie wat op soortgelyke gevalle gekaap is. Die ondersoek duur nog voort. 

Heroïenfonds by grenspos gevind

Sewe sakke met heroïen is gisteraand by die Lebombo-grens naby Komatipoort gekry toe twee verdagtes dit deur die grenspos wou smokkel. Dit wil voorkom of hulle onderweg was na Johannesburg. Supt. Arrie de Beer van die provinsiale misdaadvoorkomingseenheid het in ‘n onderhoud meer oor die voorval vertel.

Luister HIER

Luister HIER

Luister HIER

Laat weet ons gerus sodra jy in nood verkeer sodat ons die krag van 'n netwerk luisteraars tot behoud van die gemeenskap kan gebruik. Kontak die ateljee by 013 7411 999.

Twee senior Thaba Chweu Munisipaliteit lisensie eksaminators is Vrydag op aanklag van bedrog en korrupsie gearresteer.

Twee verdagtes, ‘n drie-en-veertig jarige en 44-jarige, se saak van bedrog en korrupsie word tans ondersoek nadat hulle Vrydag gearresteer is omdat hulle as twee senior Thaba Chweu munisipaliteit se lisensie eksaminators bedrog en korrupsie in Lydenburg gepleeg het. Volgens kapt. Leanord Hlati, woordvoerder van die polisie se kommersiële tak, word die saak al sedert 2007 ondersoek. Hy sê hulle het inligting ontvang dat die twee amptenare, in samewerking met van die bestuur skole in Lydenburg, lisensies ontwettige uitgee. Kliënte moes na bewering vyf-duisend-rand betaal, maar hulle word nooit getoets nie. Hulle moes klaarblyklik net vir die tyd wat die toets afgelê word, wag, vanwaar hulle daarna hulle lisensie kon afhaal. Die 44-jarige Phenius Manzini, eienaar van die Manzini bestuurskool in Lydenburg, is ook Donderdag gearresteer op aanklag van bedrog. Hy het reeds Vrydag in die hof verskyn, maar sy saak is tot môre uitgestel. Die ander twee verdagtes van die Thaba Chweu munisipaliteit, verskyn vandag in die hof.

Vier verdagtes gearresteer op aanklag van brandstigting.

Twee van die vier verdagtes is verlede week gearresteer nadat hulle onwettige brande naby Nelspruit gestig het. Die vier-en-vyftig-jarige Samaria Mazibuko en die nege-en-twintig-jarige Thembi Nkosi se arrestasie het gevolg nadat Simeon Nkosi, vier-en-dertig, en Joseph Nkambule, vier-en vyftig, onderskeidelik op 20 en 29 April die jaar gearresteer. Hullehet Vrydag op verskeie aanklagte van brandstigting in die Barberton se magistraatshof verskyn. Volgens Kapt. Leonard Hlati, woordvoerder van georganiseerde misdaad, wil dit voorkom of die vier verdagtes onder meer op 27 Januarie die jaar ‘n huis by Pienaar, net buite Nelspruit afgebrand het. Hulle het Robert Tshikakole se huis se venster gebreek, die huis  met brandstof gesproei en dit  aan die brand gesteek. Die saak word uitgestel tot 27 Mei.  

Twee van die vier verdagtes wat gister uit Secunda se tronk ontsnap het, is nog op vrye voet.

Vier verdagtes, wat gister uit Secunda se tronk ontsnap het, was net na nege-uur gisteroggend in ‘n kaping by ‘n Shell vulstasie betrokke. Die 29-jarige Bafana Mlangeni, wat met sy Volkswagen gholf by die vulstasie stilgehou het, is in die regterkantste skouer geskiet met ‘n vuurwapen wat die verdagtes  by die polisie in die tronk gesteel het. Volgens ‘n kommunikasiebeampte van die provinsiale polisiekantoor, Dimpho Nkosi, het die vier verdagtes die polisiebeamptes oorrompel, ‘n vuurwapen gesteel en die beamptes in die sel toegesluit toe hulle ontbyt gekry het. Nkosi het gesê hulle het dadelik met die Gholf ontsnap, maar die polisie het die voertuig net buite die dorp teruggevind en daarin geslaag om twee verdagtes,Maxwell Skosana en Thomas Mdonsela, te arresteer. Jeremia Nkombule en Kenneth Khumalu word steeds gesoek. Hulle word nou aangekla vir diefstal, kaping, poging tot moord en ontsnapping uit die tronk. Vir enige inligting rondom die twee verdagtes wat nog op vrye voet is, bel die tolvrye nommer: 08600 10111.

Die twee lisensie beamptes van die Thaba Chweu munisipaliteit is vandag op R2 000 borgtog elk vrygelaat.

Die twee lisensie beamptes van die Thaba Chweu munisipaliteit wat vanoggend in die Lydenburgse magistraat verskyn het op aanklag van bedrog en korrupsie, is op borgtog van R2 000 elk vrygelaat. Die 44-jarige Bruce John Nel en die drie-en-veertig jarige André Leon van Zyl, is Vrydag gearresteer omdat hulle in samerwerking met sommige bestuurskole in Lydenburg, lisensies onwettig uitgee. Die saak word al sedert 2007 ondersoek. Radio Laeveld het vanoggend berig hoe kliënte klaarblyklik  vyf-duisend-rand betaal, maar hulle word nooit vir hulle lisensies getoets nie. Hulle moes na bewering net vir die tyd wat die toets afgelê word, wag, vanwaar hulle daarna hulle lisensie kon afhaal. Die 44-jarige Phenius Manzini, eienaar van die Manzini bestuurskool in Lydenburg, is ook Donderdag gearresteer op aanklag van bedrog. Hy het reeds Vrydag in die hof verskyn. Manzini is tans onder polisiebewaking en al drie die verdagtes verskyn môre weer in die hof.

Twee mans is gister buite Malelane gearresteer op aanklag van gewapende roof.

15 Mei 2009 - Naranda Leeuwner

Twee verdagtes van onderskeidelik twintig en twee-en-twintig is gister op aanklag van gewapende besigheidsroof gearresteer toe hulle by Niewco skrootwerf buite Malelane in Tonga amper twee duisend rand gesteel het. Hulle het die man wat by die skrootwerf werk, met ‘n wapen aangehou en hom van al sy geld beroof. Hy het alarm gemaak en binne minute het die polisie gereageer en die twee mans gearresteer. Hulle is steeds onder polisie bewaking en gaan heel moontlik vandag in die magistraathof  in Malelane verskyn.

‘n Man is gister aangekeer nadat hy twee 15-jarige meisies verkrag het.

‘n 25-jarige man verskyn vermoedelik vandag in die hof op aanklagte van verkragting nadat hy twee 15-jarige meisies eergister in Bethal verkag het. Volgens die provinsiale polisiewoordvoerder, supt. Aby Khoabane het die twee meisies winkel toe gestap vanwaar die man hulle opgetel het. Hy het hulle na sy huis geneem en verbode flieks aan hulle gewys. Hulle het volgens Khoabane ongemaklik gevoel en gevra dat hy hulle huistoe neem. Die verdagte het sy motor gesluit en hulle beide binne die voertuig verkrag. Die meisies is vir mediese ondersoeke gestuur nadat hulle hom uitgeken het.

Groot ongelukkigheid heers net buite Ogies in die Hoëveld nadat inwoners van die Thola nedersetting al vir 14 jaar sonder water sit.

Tientalle  Thola-inwoners net buite Ogies het gisteraand die adjunk minister van binnelandse sake, Malisi Gigaba, se voertuig met klippe gegooi toe sy hulle in die nedersetting gaan toespreek het. Volgens supt. Arrie de Beer van die provinsiale misdaadvoorkomings operasie, wil dit voorkom of hulle van die Ehlanzeni munisipaliteit se raadslede verwag om  afstand te doen van hulle poste omdat hulle nie effektiewe dienslewering gee nie.  Groot ongelukkigheid heers omdat dié inwoners al vir 14 jaar geen water in die nedersetting het nie. Die aggressie het egter net vir ‘n rukkie geduur.

Witrivier kinders blink uit.

Die Laerskool Witrivier kondig die week met trots die onder 12 en onder 13 lede wat die provinsiale rugbyspan gehaal het, aan. Venessa Roets, die skakelbeampte van die skool, het gesê agt van die o.12’s is in die finale Mpumalanga proewe se rugbyspan opgeneem. Dit sluit Telvin Mhlongo, Fana Ngwenya, Heinrich Neethling, Franco Concalves, Cyprian Nkomo, Jandré Venter, Martin Mangwiro en Edward Shabango in. Die Witrivierspelers wat vir die o.13 Mpumalanga rugbyspan gekies is, is Werner Neethling, Sibosiso Mkhomezulu, Wiseman Mazibuko en Siphomandla Shongwe.

Cope verteenwoordiger moet bedank.

14 Mei 2009 - Naranda Leeuwner

Die politiekeparty, Congress Of The People (Cope), se verteenwoordiger in die wetgewer, Sizile Ndlovu, is gister deur die party aangeraai om te bedank omdat die premierskandidaat, Zali Madonsela, Ndlovu se plek gaan inneem. Ndlovu is net ‘n week gelede as lid van die wetgewer ingehuldig nadat hy as Cope se voorsitter en nommereen-kandidaat op die verkiesingslys verkies was. Verwarring het glo ingetree oor wie van die twee eintlik ingehuldig moes word.  Dit wil ook voorkom of Ndlovu klaarblyklik ook  verkeerdelik as die nommereen kandidaat aangewys is en Madonsela  gaan vanaf volgende week die party se nuwe wetgewerslid vir Cope word.

Nelspruit, en Primkop buite Witrivier, is twee van die 22 plekke in die land wat die skoonste kraanwater het. 

Daar is net 22 van die twee-honderd-vier-en-tagtig owerhede in die hele Suid-Afrika wie se kraanwater van die skoonste is. Nelspruit en Primkop, net buite Witrivier, is twee van die 22 plekke wie se inwoners met vrymoedigheid water uit krane kan drink. Die Minister van Waterwese en Omgewingsake, Buyelwa Sonjica, het dié presteerders vroeër die week met ‘n sogenaamde “blou druppel” vereer vir hul watergehalte, bestuur van drinkwater en die instandhouding van aanlegte. Die bloudruppelstatus word beskryf as die munisipaliteite en waterowerhede wat aan 95 % van die vereiste standaarde vir die bestuur van drinkwatergehalte soos voorgeskryf, voldoen.  Daar is ook Blou Druppel Verslag vir 2009 bekendgestel waarin die regering ferm sal optree teen plaaslike owerhede en waterrade wat nie aan die drinkwaterstandaarde voldoen nie. Dit kan ook strafregtelik van aard wees.

’n Vrou se liggaam in Vosman net buite Witbank gevind.

13 Mei 2009 - Naranda Leeuwner

Die liggaam van ‘n vrou is gister net buite Witbank in Vosman gevind nadat sy nie  eergister huis toe gekom het nie. Volgens die provinsiale polisie woordvoerder, supt. Aby Khoabane, is haar lyk naby haar huis gevind. Sy het klaarblyklik ernstige  beserings aan haar bors en hoof opgedoen. Haar familie het tydens polisie ondervraging bekend gemaak dat sy in ‘n bakleiery met haar kêrel was. Khoabane sê niemand is nog gearresteer nie en moontlike verdagtes sal eers met verdere ondersoek ondervra word.

‘n Gewapende roof het vanmiddag by Planet Nails plaasgevind. 

Daar was vanmiddag omstreeks 14:00 ‘n gewapende roof by Planet Nails in Nelspruit waarin vyf verdagtes betrokke was. Volgens Vernon Lancester, algemene bestuurder van Hi-Tech Nelspruit, het twee van die verdagtes die winkel betree terwyl die winkelier na ‘n agterste vertrek beweeg het.  Hulle het haar persoonlike besittings sowel as die geld in die kleinkas gesteel.  Sy het die paniekknoppie gedruk waarop Hi-Tech gereageer het.  Hi-Tech Sekuriteit Nelspruit het die bottelgroen Volkswagen Jetta met nommerplaat VDN 229 GP, deur middel van hulle soeksisteem in KaNyamazane opgetel.  Dis nog nie seker of die verdagtes al vasgetrek is nie.

Polisie hou padblokkade wat suksesvolle resultate lewer.

Die finale uitslae van die padblokkade wat die plaaslike polisie, in samewerking met Zimbabwe, Mosambiek, Swazliand en Lesotho by die se tolhek op die N4 by Malelane te hou het, is bekend gemaak. Radio Laeveld het in die een-uur nuus berig dat groot sukses met die padblokkade bereik is. Volgens supt. Arrie de Beer van die provinsiale misdaadvoorkomings operasie, het hulle gister reeds met die padblokkade begin. Hy sê hulle het in totaal drie gesteelde bakkies en een Yaris opgespoor asook drie sleepwaens herwin. De Beer sê in totaal is 77 onwettige immigrante gearresteer wat almal more in die hof gaan verskyn. Van die onwettige immigrante is onder meer van Pakistan en Swaziland afkomstig. Een van die verdagtes wat in die SARS diefstal in Komatiepoort vroeër die week betrokke was, waar miljoene rande se sigarette en ander items gesteel is, is ook gearresteer. Twee persone wat dagga in hulle besit gehad het, is ook tydens die padblokkade vasgetrek.

Die N4 buite Middelburg raak meer gevaarlik wat kapings betref.

Nóg ‘n trok is gisteraand omstreeks elf-uur op die N4 van sy wiele gekaap nadat twee verdagtes die trok van die pad af gedwing het. Die wiele en selfoon beloop op ‘n beraamde bedrag van een honderd duisend rand. Dit wil voorkom of nog twee verdagtes in ‘n Mazda Sting net langs die pad weggekruip het. Hulle het die die trokbestuurder vasgebind en hom met wapens in die Mazda aangehou. Die polisie is van net twee ander verdagtes bewus wat die agt wiele en die motoris se selfoon besteel het. Hulle het blykbaar vir ‘n geruime tyd langs die snelweg deurgebring en vermoedelik ‘n bakkie gekry om die wiele op te laai en van die toneel  te vlug. Die moontlikheid dat dit dieselfde verdagtes is wat verlede week die trok en bus op dieselfde pad gekaap het, word ondersoek. Die polisie waarsku motoriste op daardie pad en raai hulle aan om nie langs die snelweg te stop nie.

Polisie hou padblokkade wat suksesvolle resultate lewer.

Die plaaslike polisie het in samewerking met Zimbabwe, Mosambiek, Swazliand en Lesotho ‘n operasie van stapel  gestuur om ‘n padblokkade by Kaapmuiden se tolhek op die N4 by Malelane te hou. Volgens supt. Arrie de Beer van die provinsiale misdaadvoorkomings operasie, het hulle gister reeds met die padblokkade begin en groot sukses bereik. Hy sê hulle het vanaf vanoggend reeds drie gesteelde voertuie en  drie gesteelde sleepwaens herwin. Volgens de Beer is 58 onwettige immigrante van onder meer Pakistan en Swaziland ook gearresteer. Hulle verskyn klaarblyklik more in die hof. Finale terugvoering oor die polisie se suksesse met die padblokkade sal tydens  die 14:00 nuus bekend gemaak word.

En  ons bring vir jou die sport uitslae van Barberton en Bergvlam se sportdag.  

Die Hoërskool Bergvlam se o.14 hokkiespan het naam hoog gehou teen Barberton toe hulle met slegs nege spelers ‘n telling van ses nul op die telbord kon kry. Barberton se o.15 en o.16 spanne het egter met geesdrif teruggeveg en die Vlammies op hulle neuse laat kyk toe hulle met vleuende vaandels gewen het. Die tweede spanne het egter gelykop gespeel met Barberton se eerste span wat ook naam hoog gehou het toe hulle die wedstryd gewen het. 

Bergvlam se rugby het egter beter gevaar toe die o.14’s 49 – 0 gewen het. Blessing Nxomalo was as die man van die wedstryd aangekondig. Ander drieë is onder meer deur Gerhard Botha, Gerhard Lubbe en Sizwe Mashabane van Bergvlam  gedruk en  hulle het regstreeks uitstekende verdediging getoon om te verhoed dat Barberton punte op die telbord sit. Die o.15 Vlammies het 7 – 0 gewen, die tweede span 21 – 12 en die eerste span het in ‘n naelbyt wedstryf 17 – 15 gewen. Reinhardt Kruger, Ryan Steyl en Ruan Ritson van Bergvlam was die uitblinkers wat drieë gedruk het.

’n 51-jarige man vanoggend in Shepardstraat in Nelspruit  in sy woonstel vermoor.

8 Mei 2009 - Naranda Leeuwner 

‘n 51-jarige man is vanoggend vermoor in sy woonstel in Shepardstraat by Shepardpark in Nelspruit aangetref nadat die man se bediende vermoedelik op hom afgekom het. Volgens die Nelspruit se polisiewoordvoerder, Insp. Dawie Pretorius, is dit nog nie seker hoe die man vermoor is nie. ‘n Forensiese span van Middelburg is tans op die toneel om verdere ondersoek in te stel. Daar is ook tans onbevestige berigte dat ‘n skootrekenaar en voertuig ook vermis is. ‘n Volledige verslag word later vandag deur die polisie vrygestel.

Polisiebeamptes arresteer twee verdagtes in verskillende voorvalle nog voordat die diefstalle plaasgevind het.

Twee soortgelyke voorvalle het gister in Carolina en by Chrissiemeer plaasgevind waar die polisie altesaam vier verdagtes gearresteer het nog voordat die diefstalle plaasgevind het. Twee verdagtes wou ‘n 50-jarige vrou van haar handsak beroof toe twee polisiebeamptes van Chrissiemeer wat patrollie gedoen het, die verdagtes gewaar het en hulle vasgetrek het. Volgens die provinsiale polisiewoordvoerder, supt. Aby Khoabane, is die een 25-jarige verdagte in die linkerbeen geskiet en is tans onder polisiebewaking by die Ermelo se staatshospitaal. Die ander verdagte is ook gearresteer.

In Carolina het drie verdagtes ook ‘n vrou van haar handsak probeer beroof toe die polisie spoedig op die toneel verskyn het. Die een verdagte is in die been geskiet en ‘n ander een is gearresteer. Een van die verdagtes het van die toneel gevlug en is nog op vrye voet. Niemand het nog in die hof verskyn nie.

Twee mans verskyn in die Evander hof op aanklagte van moord op ‘n 19-jarige sekuriteitswag.

7 Mei 2009 - Naranda Leeuwner 

Twee sekuriteitswagte verskyn vandag in die Evander se hof op aanklagte van moord nadat hulle ‘n  19-jarige kollega vroeër die week twee keer in die rug en een keer in die maag geskiet het. Dis nog nie seker hoekom die moord gepleeg is nie. Hulle het die lyk in bosse tussen Evander en Embulenhle  gegooi en met ‘n Mahindra bakkie na Kwazoeloe-Natal gevlug. Die sekuriteitswagte, wie se name nog nie bekend gemaak kan word nie omdat hulle nog vandag  in die hof moet verskyn, het in ‘n oop area na teikens geskiet en ‘n lawaai afgegee. Volgens die provinsiale polisie woordvoerder, supt Aby Khoabane, het die een wag die ander geleer skiet toe inwoners die polisie in kennis gestel het van geweerskote in die omgewing. Hulle is in hegtenis geneem nadat die polisie ook bloed in die bakkie en aan hulle klere gekry het. Hulle het hul samewerking getoon om die liggaam uit te wys.

‘n Moontlike kapingsindikaat is bedrywing op die N4 naby Middelburg.

Die polisie ondersoek tans die moontlikheid vir ‘n kaping sindikaat op die N4 by Middelburg nadat ‘n skoolbus Dinsdagmiddag omstreek twintig-voor-vyf op die Arnot pad gekaap is.Radio Laeveld het vroeër die week berig hoe ‘n trok ook deur vyf verdagtes op die N4 gekaap is. Volgens die provinsiale woordvoerder van die polisie, supt. Aby Khoabane, het drie verdagtes die skoolbus, met geen kinders in, gekaap, die busbestuurder na die naaste bosse geneem, hom uitgetrek en vasgebind. Hulle het dadelik met die skoolbus gevlug. Die bus, met sy nommerplaat CTD 268 MP, word steeds versoek. Die busbestuurder, wie nie sy naam bekend wou maak nie, het ongedeerd daarvan afgekom. Die polisie vra samewerking om die sindikaat vas te trek en die gesteelde trok en bus terug te vind.

Bergvlam redenaars presteer.

6 Mei 2009 - Naranda Leeuwner 

Die Hoërskool Bergvlam se redenaars het uitstekend gevaar in die semi-finale rondte wat in Witbank plaasgevind het. Charlotte van Rooyen, Janie van der Merwe, Anri de Lange, Mizan van der Merwe, Georgia Periglieus, Bernice Serfontein en Hendo Jordaan het almal deurgedring na die finale rondte van die redenaarskompetisie wat in Oktober in Pretoria gaan plaasvind. Volgens die skakelbempte van die skool, Magda van der Merwe, het die skool sterk redenaars wat altyd goed vaar in die Radikale Renenaarskompetisie wat jaarliks aangebied word.  

Foto: Renenaars: Die presteerders van die semi finale rondte vir redenaars is van links voor: Jani van der Merwe, Mizan van der Merwe, Bernice Serfontein, Charlotte van Rooyen, Hendo Jordaan, Georgia Periglieus en  Anri de Lange. 

Vier verdagtes het lugtyd ter waarde van R5 700 uit ‘n kafee in Shoemansdal gesteel.

Vier verdagtes het gister omstreeks 14:00 die 26-jarige Amal Savuk met vuurwapens in sy broer se winkel aangehou. Volgens ‘n provinsiale polisiewoordvoerder, supt. Aby Khoabane, het een van die vier verdagtes tot agter die toonbank geloop, ‘n vuurwapen teen Savuk se hoof gehou en selfoonlugtyd ter waardevan R5 700 gesteel. Die ander vier verdagtes het die perseel opgepas. Hulle het niks anders gesteel nie en dadelik van die toneel gevlug. Khoabane sê dit was moeilik om die verdagtes vas te trek en niemand is in die voorval gearresteer nie. ‘n Saak van gewapende roof word tans ondersoek.

‘n 59-jarige vrou is net buite Nelspruit vanuit haar stilstaande voertuig beroof.

Vyf verdagtes wat betrokke is by ‘n kaping-sindikaat is steeds op vrye voet.

‘n 30-jarige man van Swaziland, Sibosiso Mweli, is op die N4 naby Middelburg gekaap nadat twee verdagtes, wat hulle as verkeersbeamptes voorgedoen het, hom van die pad naby Wonderfontein afgetrek het. Mweli, wat in ‘n wit Nissan trok met ‘n sleepwa gery het, is deur die verdagtes afgetrek en het die verkeersbeamptes hom beveel om twee mans en ‘n vrou ‘n saamrygeleentheid te gee. Volgens Supt. Aby Khoabane, provinsiale woordvoerder van die polisie, het Mweli ingestem omdat hy vreemd in die land is. Die vrou het ‘n wapen by haar gehad, hom geblinddoek en agter in die trok gelaai. Hulle het in die rigting van Hendrina gery voordat hulle Mweli langs die pad afgelaai het en van die toneel gevlug het. Die polisie vra vir samewerking in die verband. Khoabane het gesê dis ‘n groot prioriteit om die vyf verdagtes vas te trek.

Bergvlam Ope Skaaktoernooi

4 Mei 2009 - Naranda Leeuwner

Die afgelope Saterdag het 191  skaakspelers en dertig beamptes van regoor die provinsie aan die Bergvlam Ope Skaaktoernooi deelgeneem wat in ‘n A, B en C formaat geskied het. Volgens Magda van der Merwe, skakelbeampte van die skool, het die A-kategorie deelnemers al voorheen Laeveldkleure verwerf en is hulle in, of voor 1995 gebore. Die B-kategorie het spelers ingesluit wat in of ná 1996 gebore is en ook al Laeveld-kleure verwerf het en die C-kategorie was beginners wat na 1999 gebore is maar nog nie Laeveld-kleure verwerf het nie. Bergvlam se Danie Snyman het ‘n  26ste plek behaal en Michal Izeboud was 33ste. Francois de Jager was 49ste van die 97 inskrywings.

Die A-afdeling wenners was: 

 1. JM Bezuidenhout 6.0

 2. SB Zitha 5.5

 3.  M. Craig 5.0 

B Afdeling se wenners was:

1.  M Hansen 6.0

2.  MPH Mashego 5.0

3.  A Ngwenya 5.0 

C Afdeling wenners:

1.  K Kliengbiel  5.5

2.  IPW Pohl 5.0

3.  M van Tonder 4.5    

Skaak1.jpg: Francois de Jager van Bergvlam konsentreer voor hy sy volgende skuif maak.Skaak2.jgp: Michal Izeboud van die Hoërskool Bergvlam in aksie.

Drie Hoërskool Bergvlam onderwysers word in die Ehlanzeni-streek vereer.

4 Mei 2009 - Naranda Leeuwner

Drie van die Hoërskool Bergvlam se onderwysers is die week vereer tydens die department van Onderwys se prysuitdelingsfunksie. Liandra Prinsloo het die toekenning vir die beste uitslae vir visuele kuns vir gr 12-leerlinge in die Ehlanzeni-streek ontvang. Karen Brits was die onderwyser wat die beste uitslae vir gasvryheidstudies vir gr.12’s ontvang het en Marina Swart is ‘n gr12-onderwyser wat ‘n toekenning vir toerisme gekry het.

Foto: van links Liandra Prinsloo, Karen Brits en Marina Swart. 

Sindikaat-verdagte vasgetrek deur inwoners

‘n Verdagte wat moonlik betrokke in ‘n diefstal sindikaat is, is vanoggend vasgetrek nadat gesteelde goedere by die Shandon Estate op die Uitkykpad, Nelspruit gevind is. Volgens  Marlise Burger, operasionele bestuurder  van Hi-Tech Wagte, het hulle ‘n oproep van die bestuurder van Shandon, Ben Lamprecht gekry, nadat ‘n wag ‘n verdagte teen die draad sien staan het. Die wag het klomp goedere duskant die draad sien lê en ondersoek ingestel. ‘n Plasma televisie, ‘n staan  horlosie, verskeie DVD-spelers en DSTV masjiene, klere en kombuisware is in die gras gevind. Die verdagte is in hegtenis geneem en is tans in aanhouding om sy makkers vas te trek. 

Radio Laeveld het ‘n onderhoud met Ben Lamprecht, bestuurder  van Shandon Estate, tydens Dagblad gehad, waarin hy meer oor die voorval vertel.

Dankie Vir Jou Deelname!

Dis met waardering dat ons kan terugsit en luister waarna elke luisteraar van Radio Laeveld graag (of soms nie!) wil luister en wat ons kan doen om dit wat jy wil hoor, aan te bied!

Met die aanbreek van ons eerste Marknavorsing & Meningopname, regstreekse uitsending op 19 Maart '09, is almal dit eens dat daar 'n groot 'OOR' vir gereelde luister nodig is. Desnietenstaande, was dit 'n aand vol pret en plesier, 'n ervaring van gereelde luisteraars wat die gesigte agter die stemme kon ontmoet (en sommer dadelik vir daardie persoon kon vertel hoe hy oor daai program voel), 'n ervaring van programaanbieders om te luister in plaas van te praat, en 'n ervaring om die "Potjiejol" te meng tot 'n reënboog van geure en smake!

Jy het gepraat! - Ons het geluister!

• Dit is weereens duidelik bevestig dat ons hoofsaakik radio luister vir drie redes (ook in volgorde) 1. Plaaslike Inligting, 2. Musiek & 3. Vermaak.
• Ons Sondag programsamestelling het gebalanseerde reaksie ontlok, met hoofsaaklik kommentaar oor musiekkeuse.
• Die twee belangrikste fokuspunte vir programinhoud is gesentreer rondom plaaslike en Christelike programinhoud.
• Musiekkeuses het hoofsaaklik uit die 1960-1980 era gekom en heelwat versoeke vir meer geestelike, gospel en godsdienstige musiek (nie net gedurende gewyde programering nie).
• Klassieke musiek- en jeugprogramme het gemengde gevoelens ontlok met hoofsaaklik die groepe daarvoor en daarteen.
• Boeremusiek is, en bly steeds gewild, veral onder aanbieders. Luisteraars keuse dui aan dat dit as vanselfsprekend aanvaar word.
• Die belangrikheid van taal, kultuur en geskiedenis is weereens bevestig.

Daar was heelwat interessante versoeke met nuwe program-idees en soms sterk opinies oor musiekkeuse en program-inhoud, soos die verhouding tussen die hoeveelheid gesels en musiek.

Een ding is seker: Dat deelnemende luisteraars passievol oor Radio Laeveld voel en 'n ernstige bydrae wil lewer tot die suksesvolle voortbestaan van die Gemeenskap Radiostasie.