Die personeel van die bekende Bushveld Lodge op die Kaapse Hooppad, het benoude oomblike beleef toe ‘n veldbrand vanmiddag oor die teerpad gespring en een van die gastehuise afgebrand het. Brandweerwaens en ‘n helikopter is ingespan om te help om die vuur te blus. Gelukkig is niemand tydens die voorval beseer nie. Die voorval is net weereens ‘n waarskuwing dat die brandseisoen op hande is en Laevelders word daaraan herinner om nie ongemagtigde vure of voorbrande tydens sterk wind te maak nie. Vir bystand tydens veldbrande of met die beplannimng van voorbrande kontak 0860 NO FIRE.

Bergvlam Revue weer hier!

Hoërskool Bergvlam se revue Tiener Tempo word vanaf 27 Julie tot 31 Julie  in die stadsteater opgevoer.  Dié  puik produksie is ‘n sang- en danservaring oor die lewe van tieners.  Dit word aangebied onder leiding van die bekwame mev. Elza Vorster en choreograaf Tolly Nel.  Plekbesprekings kan reeds vanaf Maandag 22 Junie by die finansiële kantoor tydens kantoorure gedoen word.  Die tye is as volg:  Maandag 27 Julie 14:30 Middagvertoning vir bejaardes, Dinsdag 28 Julie 13:30 Middagvertoning vir gr.7’s en ‘n aandvertoning vir Bergvlamleerders om 19:00 @ R30.00 per leerling. Woensdag 29 Julie en Donderdag 30 Julie 19:00 vir die publiek @ R50.00 per persoon. Vrydag 31 Julie 18:00  Gala-aand teen R100.00 per persoon wat ‘n vingerete insluit. Navrae by die skool 013- 7411025/6. 

’n Nigeriër wat daarvan aangekla word dat hy op bedrieglike wyse met twee Suid-Afrikaanse vroue getroud en in besit van verskeie Suid-Afrikaanse paspoorte is, sal Maandag aansoek om borgtog in die Witbank landdroshof doen. Die 40-jarige Ogomezie Jude is op 25 Junie gearresteer nadat twee vroue tot hul skok by binnelandse sake vasgestel het dat hulle met hom getroud is ofskoon hulle hom nog nooi gesien het nie. Jude is glo ook in besit van nege vervalste id-boekies gevind.

Corridor Nuus

Die inwoners van Marlothpark is behoorlik ontstoke oor die slegte toestand van hul paaie. Die grondpaaie wat hierheen lei is weke gelede geskaap en daagliks word voertuie en bande beskadig. Volgens Nkomazi Munisipaliteit, is dié paaie die verantwoordelikheid van die provinsiale regering. Die plaaslike munisipaliteit het na aanleiding van Corridor Gazette se navraag, wel die pad weer geskraap, maar verskeie navrae aan die regering was vrugteloos. Dit was duidelik dat niemand verantwoordelikheid wil neem vir die paaie nie en intussentyd ly die inwoners van Marlothpark daaronder.  

Daar is steeds geen uitsluitsel oor die ligging vir die Kruger Nasionale Wildtuin se nuwe beplande hotel nie. Inwoners van Leopard Creek staan die ontwikkeling tee, aangesien die voorkeur perseel, reg oorkant dié spogbuurt geidentifiseer is. Daar is egter reeds tenders uitgesit vir moontlike ontwikkelaars om aansoek te doen vir die projek.

Nkomazi se gemeenskappe het hul hande uitgestrek om hul medemens te help in ondersteuning van Nelson Mandela Dag verlede Saterdag. Veral Vigs-wesies het hulp ontvang in die vorm van komberse, klere en ander bruikbare items. Die Departement van Onderwys het Silindokuhle Spesiale Skool in Mangweni uitgesonder waar 190 gestremde kinders skoolgaan en in die koshuis woon. Gebreekte vensters en deure is vervang, die groente tuin en sportvelde het aandag ontvang en nuwe matrasse is ook vir die koshuis geskenk. 

Die bevelvoerder van die georganiseerde misdaadeenheid in Mpumalanga, superintendent Obed Ngwenya,  is vanoggend in 'n vermeende sluipmoord poging gewond. Die voorval het gebeur toe hy sy huis op Middelburg verlaat het. Ngwenya word vir skietwonde aan sy been en arm behandel. Die aanvallers het na die skietery van die toneel met ‘n Groen Hyundai Tucson met getinte vensters en ‘n rooi Toyota Corolla weggejaag. Die Corolla is later nie ver van Ngwenya se huis verlate gevind. Enige persoon met inligting moet onverwyld Kapt. Leonard Hlathi by 082 462 0804 kontak. 

Geweldadige betogers van Lydenburg in hof

Intussen net verskeie verdagtes vandag in Mpumalanga in die hof verskyn in verband met gewelddadige betogings twee weke gelede in Lydenburg waarin een persoon dood is. Die betogings was te wyte aan swak munisipale dienslewering.

Corridor Nuus (soos op Dagblad)

Die inwoners van Komatipoort moet deesdae neus in die lug loop aangesien verskeie dele in die dorp oorvloei is met riool wat opstoot in die dreine en in die strate uitvloei. Ten spyte van verskeie oproepe aan die munisipaliteit, is daar die afgelope maand nog nie veel gedoen om die probleem op te los nie. Volgens die munisipaliteit se woordvoerder, Cyril Ripinga, het hulle al ses keer die pompe vervang maar vanwee die klipperige area waar hulle dit moet installeer, breek dit elke keer. Hy het bygevoeg dat hulle personeel hard aan die werk is om die probleem reg te stel.  

Dan is vier polisiemanne van die Nkomazi gebied beloon met ‘n sertifikaat wat deur die provinsiale kommissaris, Rex Machabi oorhandig is vir uitstekende dienslewering in hul veld van werk. Dié polisiemanne sluit in speur-inspekteur Louis Stander van Malalane wat vier huisrowers vasgetrek het wat die dorp geterroriseer het en gesteelde items en ‘n vuurwapen teruggevind. Van die Onderberg Hone-eenheid is Sersant JR van der Westhuizen gelukgewens nadat hy die afgelope jaar meer as R4mijoen se dwelms gekonfiskeer en 147 mense gearresteer het. Konstabel Phineas Mathabela het 826 verdagtes gearresteer en meer as R1,2 mijoen se gesteelde items teruggevind. Laastens het inspekteur Thomas Mabuza van Tonga verskeie moordenaars agter tralies gesit en uitstekende vonnisse in die hof verkry.  

‘n Jongman van Malalane het letterlik “soos in die films” vir sy geliefde gevra om te trou. De Wet du Plessis het verlede week vir sy vriendin, Sindy Kotzé gevra om aan hom verloof te raak voor 300 gillende vroue wat Nu-Metro se ‘aand uit vir vroue-promosie’ bygewoon het om die nuwe film, The Proposal, te kyk. Voordat die film nog begin het, is Sindy vorentoe geroep aangesien sy glo ‘n prys gewen het, maar toe De Wet by die teater instap het sy besef wat aan die gang was. Hy het sy ewige liefde aan haar verklaar en haar daarna gevra om met hom te trou.

Die myngroep en edelmetaal-produsent, Aquarius Platinum, beoog  om sy Everest-myn naby Lydenburg te heropen, sewe maande nadat die sluiting daarvan tot groot  werks-verliese gelei het. Sowat tweeduisend mense het hulle werk einde verlede jaar verloor, toe die nuwe myn weens swaar reën en grondverskuiwings gesluit is. Die maatskappy sê dit sal sowat 10 maande neem om produksie te hervat.